Óskemen nege 10 kún boıy túsiniksiz tútinniń qursaýynda qaldy – mınıstr jaýaby

ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev qarasha aıynyń sońǵy 10 kúninde Óskemen nege túsiniksiz tútinniń qursaýynda qalǵany týraly resmı nusqany aıtty.

- Ol jerde qorshaǵan ortaǵa kúndelikti kólemde shyǵaryndy tastalǵan. Aǵashtyń basy qozǵalmaıtyndaı tymyrsyq aýa raıyna baılanysty shyǵaryndylar aýyrlap, ushyp ketpeı jaımen tura bergen. Árıne shyǵaryndy kóp jınalǵandyqtan qap-qara bolyp kórinedi. 2022 jyldan beri memorandým bar. Qorshaǵan ortany iri lastaýshylar qolaısyz meteorologııalyq jaǵdaı bolǵan kezde shyǵaryndylardyń kólemin 20 paıyz azaıtý kerek. Óskemendegi Úlbi metallýrgııalyq zaýyty men «Qaztsınk», Sogra jylý-elektr ortalyǵy sııaqty kásiporyndardyń bári ol memorandýmǵa qol qoıǵan. Siz aıtyp otyrǵan kezeńde kásiporyndardyń bári sol kelisim boıynsha jumys júrgizdi. Endi óńirlik máslıhat qolaısyz meteo jaǵdaı kezinde tehnologııasy 24 saǵat boıy úzdik jumys isteýdi talap etpeıtin óndiristerdiń toqtat turý máselesin talqylap jatyr. Osyndaı erejeler qoldanatyn bolady, - dedi mınıstr.

Sondaı-aq ol atalǵan tájirıbe Óskemende sátti iske assa, ózge óńirlerge de engiziletinin aıtty.

- Búkil respýblıkaǵa taratý úshin kásiporyndardyń ereksheligi eskerý kerek. Mysaly Jezqazǵanda bolmaıdy. Óıtkeni 24 saǵat boıy úzdiksiz jumys istep turatyn mys óndirip, balqytatyn kásiporyndar bar. Árıne, mundaı tájirıbeni taratý kerek. Biraq áýeli Óskemende qalaı bolatynyn kóreıik, - dedi Erlan Nysanbaev. 

Buǵan deıin «Qaztsınktiń» Óskemendegi kásiporyndaryn prokýratýra tekserip jatqanyn jazǵan edik.