Óskemen meshitinde onlaın ýaǵyz jasaıtyn qosymsha jasalýda
Óńirdegi 14 dinı konfessııanyń basshylary oblystyq meshit uıymdastyrǵan ashyq esik saǵatynda bas qosty. QMDB-nyń Óskemen óńiri boıynsha ókil ımamy Ermek qajy Muqataı din ókilderimen ashyq suhbat ótkizip, meshittiń tynys-tirshiligimen, halyqqa kórsetiletin qyzmet túrlerimen tanystyrdy. Óz kezeginde konfessııa ókilderi ıslamda keń taralǵan uǵymdar týraly saýal qoıyp, bilim kókjıegin keńeıtýge tyrysyp jatty. Bul shara osy meshit bazasynda uıymdastyrylǵan musylman qyz-kelinshekterdiń respýblıkalyq semınaryna dóp kelipti. Atalmysh semınarǵa QMDB atynan qatysýshy naıb múftı Nurjan Esmahan da konfessııa ókilderimen kezdesip, el birligin bekemdeý jolyndaǵy jumystaryna tabys tiledi.
«Bizdiń el úsh jylda bir ret Álemdik jáne dástúrli dinder lıderleriniń sezin ótkizip keledi. Oǵan Elbasymyzdyń ózi tóraǵalyq etetinin de jaqsy bilesizder. Óskemendegi ashyq esik saǵaty sol basqosýlardyń jańǵyryǵy ispettes. El ishindegi yntymaqty nyǵaıtýdaǵy ortaq isterińiz berekeli bolsyn», - dedi Baýyrjan Esmahan.
Konfesıııa ókilderi oblystyq meshittiń óz jumysyna aqparattyq tehnologııalardy batyl engizip jatqanyn erekshelik retinde atady.
«Imamnyń aıtýynsha mundaǵy dinı qyzmetkerler elektrondy testileý arqyly synaqtan ótip turady eken. Dáris zaldary birneshe tildegi dinı ádebıetpen, kompıýter synyptarymen jabdyqtalypty. Zaman aǵymynan qalmaı, ony óz jumystaryna ıkemdep alǵandary unady», - deıdi Óskemen jáne Semeı epıskopy Andreı Bondarenko.
Óńirdiń ókil ımamy Ermek Muqataı aldaǵy eki aıdyń ishinde namaz ýaqytyndaǵy ýaǵyzdardy onlaın rejımde translıatsııalaıtyn androıdtyq qosymsha daıyn bolatynyn jetkizdi.
«Buǵan deıin bizdiń praktıkamyzda Skype júıesi arqyly onlaın ýaǵyzdar júrgizý bolǵan. Biraq onyń aýqymy da aýdıtorııasy da tar edi. Al androıdtyq qosymsha kez kelgen uıaly telefon ıesine qoljetimdi. Baǵdarlama 90 paıyzǵa daıyn. Eki aıdyń ishinde iske qosylady dep otyrmyz. Onyń qarjylyq shyǵynyn demeýshilerimiz kóterip otyr, - deıdi ókil ımam.
Imamnyń aıtýynsha bul qosymshaǵa bes ýaqyt namaz kezinde aıtylatyn ýaǵyzdardan bólek elektrondy kitaptar da engizilmek. Dinı ádebıettermen qosa Abaı, Shákárim sııaqty tulǵalardyń eńbekteri, salt-dástúr sıpattary da qosymshanyń mazmunyn baıytýy tıis.
Ashyq esikke jınalǵan konfessııa basshylary mundaı sharany turaqty ótkizip turýǵa ýaǵdalasyp tarady. Dástúrge aınalatyn basqosýdy ár joly ár túrli konfessııa uıymdastyratyn bolady.
Esimjan Naıqtybaıuly
