Óskemen men Semeıdegi JEO-lardy aqyrynda Reseı salýy múmkin – Energetıka mınıstrligi

ASTANA. KAZINFORM – «Samuryq-Energo» AQ basqarma tóraǵasy Qaırat Maqsutov Úkimet otyrysynan keıin ótken baspasóz máslıhatynda Óskemen men Semeıdegi jańa jylý-elektr ortalyqtaryn Reseı salýy múmkin ekenin aıtty.

Eske salaıyq, buǵan deıin Semeı men Óskemendegi JEO-lardy Qazaqstan óz kúshimen salatyny aıtylǵan edi.

«Samuryq-Energo» AQ basqarma tóraǵasy osy málimdemeniń mánin ashty.

- Semeı men Óskemendegi jylý elektr ortalyǵyn salýǵa daıyndyq jumystary júrip jatyr. Onyń ishinde qarjylandyrý máselesi de bar. Túrli qarajat kózi qarastyrylyp jatyr – ózimizdiń qarajat ta, reseılik qarajat ta bar. Reseı taraby úkimetaralyq kelisim aıasynda osyndaı joldy usynǵan. Qazir Reseı tarabymen aqtyq sharttardy talqylap jatyrmyz. Qarjylandyrý kózi týraly túpkilikti sheshim shyqqan joq. Qarjy kózi anyqtalǵannan keıin áleýetti ERS-merdigerdi (jobalaýdan bastap iske qosqanǵa deıingi jumystardy tolyq moınyna alatyn merdiger) anyqtaýǵa kóshemiz. Munda merdigerlikke Reseı tarabynan da, jylý stansalaryn salatyn halyqaralyq konsortsııýmdar da tartylýy múmkin, - dedi ol.

Aıtýynsha, atalǵan qurylystar 2029 jyldyń ekinshi jartysynda bitý kerek.

- Sonda Reseı áli de ol jobalarǵa qatysa alady. Eshqandaı túpkilikti sheshim shyqqan joq, - dedi Qaırat Maqsutov.

Osyǵan deıin Qazaqstannyń aldaǵy qysta da Reseıden elektr qýatyn ımporttaýy múmkin ekeni týraly jazdyq.