Óskemen men Semeıde jańa ákimshilik sottar ashyldy
ÓSKEMEN. QazAqparat – Óskemen men Semeı qalalarynda jańa ákimshilik sottar ashyldy, dep habarlaıdy QazAqparat tilshisi.
Shyǵys Qazaqstan oblystyq soty baspasóz qyzmetiniń málimetine súıensek, óńirdiń negizgi eki qalasynda jańa mamandandyrylǵan aýdanaralyq ákimshilik sottar ashyldy. Olar birinshi kezekte jeke kásipkerlerdiń, zańdy tulǵalardyń, qarapaıym azamattardyń túrli memlekettik organdarǵa qatysty máseleleri men daýlaryn sheshetin bolady. Óskemendegi sottyń ashylý saltanatyna aımaq basshysy Danıal Ahmetov, oblystyq sot tóraǵasynyń mindetin atqarýshy Qaırat Chaqpantaev qatysty.
«QR jańa Ákimshilik rásimdik-protsessýaldyq kodeksi 1 shilde kúni kúshine endi. Onda «ákimshilik organdardyń kináli-kináli emestigin aıqyndaý» qaǵıdaty alǵash ret engizilip otyr. Bul – azamattardyń quqyqtaryn qorǵaý sapasyn jaqsartýǵa jáne qoǵamdy demokratııalandyrýǵa jasalǵan úlken qadam. Dál osyndaı ońdy ózgeris kezinde Shyǵys Qazaqstannyń eki birdeı shaharynda jańa ákimshilik sottar óz jumysyn bastady», - dedi oblys ákimi
Onyń aıtýynsha, alǵash ret engizilgen qaǵıdatta kásipkerler men qarapaıym azamattar ǵana emes, memlekettik organdar da óz argýmentterin sotta dáleldeýi tıis.
«Mundaı ózgeris álemdik úrdiske saı jáne kóptegen memleketter osy júıege kóshken. Bul bizdiń memlekettik organdardy óz jumysyna jaýapkershilikpen jáne muqııat qaraýǵa yntalandyrady», - dedi Danıal Ahmetov.
