Óskemen men Semeıde zańsyz jarnama konstrýktsııalary alynyp jatyr
ASTANA. QazAqparat - Shyǵys Qazaqstannyń úlken eki qalasyndaǵy ortalyq kóshelerde zańsyz qoıylǵan jarnama bannerleri men bılbordtarynyń kózi joıylyp jatyr. Basty sebep - olardyń qalanyń kelbetin buzyp, qozǵalys qaýipsizdigine kedergi keltirýinde, dep habarlaıdy ShQO ákiminiń baspasóz qyzmeti.
Eki aı buryn oblys ákimi Danıal Ahmetov jol jıegindegi ýchaskelerdi jónge keltirý týraly tapsyrma berdi. Іske bilek sybana kirisken belsendiler osy aralyqta Semeıdiń bir ózinde 47 jarnama konstrýktsııasyn jańartyp, kóshe boıynan 50 jarnama taqtasy men kergilerdi alyp tastady.
«Semeı men Óskemen kóshelerin qajetsiz jarnamalardan tazartý kerek. Ne qazirgi zaman úrdisine saı emes, ne qalaǵa kórik berip turǵany shamaly. Qarasańyzdar, joldyń eki jıeginde tolyp turǵan kásipkerlerdiń jarnamasy. Bıznesmender qoǵamdy syılaýy kerek. Biz olarǵa árkez barynsha qoldaý kórsetemiz, biraq yńǵaılaryna jyǵylmaımyz», - dedi keńeıtilgen apparat otyrysynda sóz alǵan oblys ákimi Danıal Ahmetov.
Jol jıegin syrtqy jarnamalardan tazartýǵa baǵyttalǵan istiń barysyn oblys ákiminiń orynbasary Serik Aqtanov baıandady. Aıtýynsha, jarnama taqtalary men kergilerdi alyp tastamas buryn ruqsat qaǵazdarynyń bar-joǵy, standart talaptary men «Til týraly» zańnyń saqtalýy qatań túrde tekseriledi. Keı jaǵdaıda, tipti, sotqa júginýge týra keledi.
Aıta ketý kerek, bul jumysty aýdan ortalyqtarynda da jalǵastyrý josparda tur.
