Óskemen men Semeıde turmystyq qaldyqty bólek jınaý úshin 3 myńdaı konteıner ornatylmaq
ÓSKEMEN. QazAqparat – Óskemen men Semeı qalalarynda turmystyq qaldyqty bólek jınaý úshin 2 856 konteıner men qoqys tasyǵysh 12 tehnıka jetkizildi, dep habarlaıdy QazAqparat tilshisi.
Búgin Óskemende Shyǵys Qazaqstan oblysynyń ákimi Danıal Ahmetovtiń qatysýymen qatty turmystyq qaldyqtdy bólek jınaýǵa arnalǵan konteınerler men arnaıy tehnıkany tapsyrý rásimi ótti. Óńirdiń eki qalasy úshin barlyǵy 2 856 konteıner jáne 12 jańa qoqys tasyǵysh satyp alynǵan.
Bıyl ShQO jáne Semeı qalasynyń ákimdigi Eýropa qaıta qurý jáne damý bankimen qarjylandyrý týraly kelisimge qol qoıǵan bolatyn. Atalǵan jobany júzege asyrýǵa 17 mlrd teńgeden astam qarjy bólindi. Osy jyldan bastap qala turǵyndary qatty turmystyq qaldyqty tógýge arnalǵan konteınerdi paıdalanady.
«Bul Eýropa qaıta qurý jáne damý bankimen jáne «Operator ÓKM» JShS-men birlesken jumysymyzdyń kezekti nátıjesi. Osylaısha, Óskemen jáne Semeı qalalarynda 100 myń tonna qatty jáne basqa da qoqys túrleri qaıta óńdeletin bolady. Jurtshylyqqa qoqysty bólek konteınerlerge durys suryptaýdy nasıhattaý qajet. Bul ekologııalyq mádenıetke degen taǵy bir qadam», – dep atap ótti Danıal Ahmetov.
Sonymen qatar shara barysynda Semeı qalasynyń №3 jalpy orta bilim beretin mektebi men Óskemen qalasynyń №39 orta mektebine 300 myń teńgeden arnaıy sertıfıkat tabystaldy. Oqýshylar bir jyldan astam ýaqyt boıy qoqysty durys suryptaýty nasıhattap keledi.
