Óskemen men Semeı qalalarynda medıtsına qyzmetkerleri tapshy
ShQO ákimi Danıal Ahmetov óńirdiń áleýmettik-ekonomıkalyq damýy máselesi boıynsha jınalys ótkizdi.
«Oblys kóptegen kórsetkishter boıynsha, atap aıtqanda, qurylys, ınvestıtsııa tartý, agrosektordaǵy jobalar boıynsha elde jetekshi orynda tur. Alaıda ókinishke qaraı, Zaısan, Tarbaǵataı aýdandarynda jáne Altaı qalasynda qurylys qarqyny tómendep ketti. Munyń sebebin anyqtaý úshin komıssııa qurýdy tapsyrdym», - deıdi aımaq basshysy.
Onyń aıtýynsha, Kýrchatov qalasynda áli kúnge deıin basseın jumys istemeıdi. Bul máseleni qala ákimi sheshýi kerek. Sondaı-aq jıyn barysynda áskerge shaqyrylýshylarǵa arnalǵan medıtsınalyq komıssııalardyń jańa formatyn engizý múmkindigi talqylandy.
«Áskerge shaqyrylýshylardy medıtsınalyq tekseristen aýdandyq aýrýhanalarda ótkizýge bolady. Óıtkeni olar zamanaýı jabdyqtarmen jabdyqtalǵan jáne PACS júıesine qosylǵan», - dedi Danıal Ahmetov.
Óz sózinde ol medıtsına qyzmetkerleriniń tapshylyǵy Óskemen men Semeı qalalarynda sezilip otyrǵandyǵyn jetkizdi. Onyń aıtýynsha, dárigerlerdi turǵyn úımen qamtamasyz etýge erekshe nazar aýdarý qajet.