Óskemen men Semeı arasyndaǵy jolda kólik qozǵalysyna tyıym salyndy

ÓSKEMEN. KAZINFORM — Óskemen-Semeı tasjolyndaǵy ýchaskelerdiń biri jabyldy.

ShQO Tótenshe jaǵdaılar departamenti baspasóz qyzmetiniń málimetine súıensek, aýa raıy qolaısyzdyǵyna, naqty aıtqanda boran, kóktaıǵaq pen joldyń durys kórinbeýine baılanysty joldardyń biri jabyldy.

— Saǵat 19.00-den bastap respýblıkalyq mańyzy bar Óskemen-Semeı tasjolynyń 10-103 shaqyrymynda (Ulan aýdany Gerasımovka aýyly men Abaı oblysy shekarasyna deıingi aýmaq) kóliktiń barlyq túri úshin qozǵalys jabylady. Osy rette, óńir jurtshylyǵyna joldardyń jaı-kúıin «Dármen» mobıldi qosymshasy arqyly bilip otyrýǵa keńes beremiz, — dep habarlady vedomstvo ókilderi.

Buǵan deıin dál osy jolda tek tirkemesi bar júk kólikteriniń qozǵalysyna tyıym salynǵan bolatyn.

Eske salsaq, osyǵan deıin Abaı oblysynyń polıtseıleri 100-den astam kólikten turatyn avtotizbekke jol kórsetkeni habarlanǵan.