Óskemen men Rıdder arasyndaǵy jańa jol qurylysy nege sozbalańǵa salynyp ketti
ÓSKEMEN. KAZINFORM – Óskemen men Rıdder qalalarynyń arasyndaǵy jańa jol qurylysynyń aıaqtalýyn halyqtyń kútip júrgenine 3 jyl boldy.
Jańa jol ne úshin kerek?
Bul jol týrıster úshin de, jergilikti jurt úshin de mańyzdy. Osy joldyń arqasynda sonyń boıyndaǵy Tarhanka men Topıha aýyldaryn damytýǵa múmkindik jasalmaq. Biraq eń bastysy - jolǵa shyqqandar Óskemenge áldeqaıda tezirek jetetin bolady. Qalalar arasyndaǵy qoldanystaǵy kólik joly 105 shaqyrym. Bir jaqtan ekinshige jetý úshin 2 saǵat ýaqyt ketedi. Al jańa jol iske qosylsa, bul ýaqyt 1 saǵatqa deıin qysqarady.
- Jańa joldyń salynyp bitýin taǵatsyzdana kútip júrmiz. Ózim Rıdder dúkenderine Óskemennen azyq-túlik tasımyn. Sol úshin eki jaqqa tezirek jetip otyrsam deımin. Kóbirek reıs jasasam, tabysym da artady. Onyń ústine oblys ortalyǵynda jumys isteıtin dostarym da kóp, - deıdi Rıdder qalasynyń turǵyny Andreı Tarasov.
Budan bólek, jańa jol Qazaqstan, Reseı jáne Mońǵolııany baılanystyratyn halyqaralyq baǵyttyń bir bóligine aınalmaq. Bul joba júk jáne jolaýshylar tasymalyn aıtarlyqtaı jeńildetedi.
Qurylys toqtap qalǵan
Sońǵy 2 jylda jańa joldyń jobasy daıyndalyp, memlekettik saraptamadan ótip, jumys kólemi men merdiger de anyqtaldy.
- «Óskemen-Tarhanka-Topıha-Cheremshanka» jolynyń jobasynda 14,5 shaqyrymdyq jańa jol salý jáne qalǵan bóligin qaıta jańǵyrtý qarastyrylǵan. Sondaı-aq Úlbi arqyly kópir salý, Tarhankadan óte bergendegi kópirdi jóndeý, Cheremshanka men Tarhanka aýmaǵyndaǵy eki ótpejoldy jóndeý josparlanyp otyr. Joldyń temirjolǵa jaqyn jerinde burǵylaý-jarý jumystaryn júrgizý kerek. Bul týnnel salýǵa qaraǵanda arzanǵa túsedi, - deıdi ShQO Jolaýshy kóligi jáne avtomobıl joldary basqarmasynyń basshysy Nurjan Jumadilov.
Joba daıyn bolyp, merdiger retinde «Kurylys Group RK» kompanııasy bekitilgenimen qurylys jumystary sol kúıi bastalmady. Buǵan sebep – qajetti qarjynyń bólinbeýi.
- Jobanyń quny – 38,3 mıllıard teńge, onyń 90 paıyzy respýblıkalyq, 10 paıyzy oblystyq bıýdjetten bólinýi tıis. Respýblıkadan bul qarajatty bekitpeıinshe jumysty bastaý múmkin emes, - deıdi N.Jumadilov.
Qurylys jumystary 21 aıǵa sozylady dep josparlanǵan. Biraq naqty qashan bastalatyny belgisiz. Ázirge jańa tasjoldyń qurylysy keıinge shegerilip, qoldanystaǵy jolǵa aýqymdy jóndeý jumystary júrgizilip jatyr.
- Bul jumystardyń jalpy quny 11 mıllıard teńgeden asady. 2024 jyly alǵashqy 30 shaqyrymdy jóndeýge 3 mıllıard teńgeden astam qarjy jumsaldy. Basqa ýchaskeler boıynsha da jóndeý qarqyndy júrgizilýde. 2025 jylǵa deıin osy jumystardy tolyqtaı aıaqtaý josparlanǵan, - deıdi «QazAvtoJol» AQ Shyǵys Qazaqstan oblysy boıynsha fılıalynyń dırektory Nurbek Temirhanov.
Túıini tarqatylmaǵan túıtkil
Jańa jol salynsa da, eskisi jóndelse de, bir mańyzdy másele sheshimin tappaıdy. Rıdderlikter Kozlýshka asýyn aınalyp ótetin jol salýdy suraǵan. Bul jerdiń eń bıik núktesi qysta jolǵa shyqqandardyń saparyn qıyndatyp tur. Ásirese órge shyǵa almaıtyn júk kólikterine aýyr.
- Kozlýshka asýyn aınalyp ótý úshin Rıdderdegi Ýlbastroı stantsııasyna shyǵatyn jol salý kerek. Ol úshin Topıhanyń oń jaǵyna shyǵýǵa týra keledi. Al onda ný orman, bıik taýlar men sý qorǵaý aımaǵy ornalasqan. ıAǵnı, kóptegen ruqsat qaǵazdaryn alý qajet bolady. Sondyqtan joba qymbatqa túsedi. Ári ony iske asyrý uzaqqa sozylady, - dep túsindirdi Nurjan Jumadilov.
Eske salsaq, osyǵan deıin Katonqaraǵaı men Buqtyrmada sý elektr stantsııalary salynatyny habarlanǵan.