Óskemen men Atyraýda sálemdemeden jasyrylǵan telefondar tabyldy
ASTANA. KAZINFORM – Óskemen jáne Atyraý qalalaryndaǵy qylmystyq-atqarý júıesi mekemelerinde QR ІІM Ulttyq ulanynyń áskerı qyzmetshileri QAJ qyzmetkerlerimen birlesip, sottalǵandarǵa tyıym salynǵan baılanys quraldaryn ótkizý áreketteriniń jolyn kesti.
Óskemen qalasyndaǵy № 17 túzetý mekemesinde er adam sottalǵan azamatqa eki uıaly telefon ótkizbek bolǵan. Tyıym salynǵan zattardy jasyrý maqsatynda ol telefondardy torttyń ishine jasyrǵan.
— Bir qaraǵanda, bul kádimgi tort boldy. Alaıda ony qolyma alǵan kezde salmaǵynyń ádettegiden aýyr ekenin baıqadym. Bul kúdik týǵyzdy. Birlesken tekserý barysynda taǵam óniminiń ishinen eki uıaly telefon men eki SIM-karta tabyldy, — dedi kezekshi baqylaýshy efreıtor Azat Janabaev.
Tyıym salynǵan zattardy ótkizýge tyrysqan Óskemen qalasynyń turǵynyna qatysty Ákimshilik quqyq buzýshylyq týraly kodekstiń 481-babynyń 1-bóligi boıynsha materıaldar jınaqtalyp, sotqa joldandy.
Dál osyndaı oqıǵa Qylmystyq-atqarý júıesiniń № 15 mekemesindegi tekserý tobynyń bólmesinde tirkeldi, onda áskerı qyzmetshiler sottalǵan azamatqa arnalǵan sálemdemeden tyıym salynǵan zattardy anyqtady.
Bul joly tyıym salynǵan zattar pisken qaraqumyq botqasynyń ishine jasyrylǵan. Tekserý barysynda áskerı qyzmetshiler úsh uıaly telefon men bir qýattaǵysh qurylǵyny tapty.
