Óskemen men Almatyda turǵyn úı- kommýnaldyq sharýashylyǵyndaǵy qaıta jóndeý jumystary qarqyndy júrýde - Ó. Shókeev
MATY. 19 tamyz. QazAqparat /Ádilet Musahaev/ - Búgingi jumys saparymyzdyń maqsaty - turǵyn úı -kommýnaldyq sharýashylyǵyndaǵy qaıta jóndeý jumystary men úleskerlerdiń problemalaryn sheshý sekildi salalyq baǵdarlamalar boıynsha bolyp otyr, dedi QR Premer-Mınıstriniń birinshi orynbasary Ómirzaq Shókeev Almatyǵa jasaǵan jumys sapary barysynda.
Ó.Shókeev turǵyn úı- kommýnaldyq sharýashylyq salasyndaǵy túıtkil - kóptegen jyldar boıy qordalanǵan úlken másele - eskirgen úılerge jóndeý jumystaryn qalaı jasaý kerektigi bolǵandyǵyn atap ótti. «Bir jaǵynan, ol páterlerdiń barlyǵy jeke menshikte, sondyqtan memlekettik bıýdjetten biz oǵan tikeleı qarjy jumsaýǵa qaqymyz joq. Ekinshiden, turǵyndardyń qaltasy birden úlken qarjyny jumsaýdy kótermeıdi. Alaıda bul máseleni tıimdi sheshetin tásil tabylǵan sekildi, ıaǵnı qaıta jóndeý jumystaryna jumsalatyn qarjynyń jartysyn memleket kóterse, qalǵanyn turǵyndar ózderi kóteredi»,-deıdi Ó.Shókeev.
Sondaı-aq ol barlyq sheshimderdi turǵyndar ózderi qabyldaıtyndyǵyn jetkizdi. Máselen, qandaı jóndeý jasaý kerek, oǵan qandaı qurylys jumystary kiredi, qandaı materıaldardy paıdalaný kerek, tipten jóndeý jumystaryn jasaıtyn qurylys kompanııalaryn tańdaý da turǵyndardyń óz erikterinde.
Premer-Mınıstrdiń birinshi orynbasary sonymen qatar memleket tarapynan salynǵan qarjyny turǵyndar 7-10 jylda birtindep qaıtarýlary kerektigin eskertip, bul turǵyndarǵa úlken jeńildik ekendigin aıtyp ótti. «Kóptegen qalalarda turǵyndar bul máseleni buryn durys túsinbeı keldi, qazir bunyń tıimdiligine kózderi jetip, jumys úlken qarqynmen júrip jatyr dep aıtýǵa bolady. Óskemen qalasy men Almatyda bul jumys jaqsy jolǵa qoıyldy. Osy eki qalanyń úlgisimen eldegi barlyq qalalarda osy jumysty qarqyndy júrgizýge qazir múddeli bolyp otyrmyz»,-dep atap ótti vıtse-premer.
