Óskemen mektepterine 5 márte «bomba qoıǵandar» sol kúıi tabylmady

Óskemen qalasynda osy jyldyń aqpan aıynda toǵyz kúnde mektepterge bomba qoıylǵany týraly 5 ret jalǵan habar bergender sol kúıi tabylmady, dep habarlaıdy QazAqparat tilshisi.

Óskemende birinshi ret bıyl 6 aqpanda sotqa jáne mektepke bomba qoıylǵany habarlanǵan. 

Alaıda tekserý barysynda eshqandaı jarylǵysh zat tabylmady.

9 aqpanda Óskemende taǵy da mektepke bomba qoıylǵany týraly habar túsip, oqýshylar men muǵalimder evakýatsııalanǵan. Tekserý nátıjesinde bomba joq bolyp shyqty.
Sondaı-aq 10 aqpan kúni qaladaǵy jıyrma alty mektepke jarylǵysh zat qoıylǵany týraly jalǵan habar túsken. 

14 aqpanda túski ýaqytta 23 mektepke bomba qoıylǵany týraly habarlandy. Alaıda bul habar da jalǵan boldy. Osylaısha, belgisiz bireýler 9 kúnde mektepke bomba qoıylǵany týraly 5 márte jalǵan habarlaǵan. 

ShQO Polıtsııa departamenti baspasóz qyzmetiniń málimetine súıensek, atalǵan barlyq fakti boıynsha QR Qylmystyq Kodeksiniń 273-babymen (Terrorızm aktisi týraly kórineý jalǵan habarlaý) sotqa deıingi tergeý amaldary qolǵa alyndy.

«Qylmys jasaǵan adamdar anyqtalǵan joq. Soǵan baılanysty sotqa deıingi tergeý toqtatyldy», - delingen aqparatta.