Óskemen máslıhaty avtobýs jolaqysynyń qunyna qatysty bastamany maquldady
ÓSKEMEN. KAZINFORM – Óskemen qalasynda qoǵamdyq kólik jolaqysy qyrkúıek aıynda ózgerýi múmkin.
Qalalyq máslıhat jol júrýdiń jańa tarıfteri týraly jobany maquldady.
Soǵan sáıkes, bir rettik jol júrý quny qolma-qol aqshasyz tólem kezinde 120 teńge, al qolma-qol tólem kezinde 200 teńge bolady dep josparlanǵan. Qazir jol júrý aqysy sáıkesinshe 90 jáne 130 teńgeni quraıdy.
Tarıfti kóterý máselesi shilde aıynda talqylanǵan bolatyn. Sol kezde qala ákimdigi jańa tarıfterdi 1 qyrkúıekten bastap engizý kózdelip otyrǵanyn habarlaǵan. Joba qalalyq Qoǵamdyq keńestiń otyrysynda da qaralǵan.
Talqylaý barysynda keńes múshelerine jolaýshylar tasymalynyń ózindik quny men kásiporyndarǵa jyl saıyn bólinetin bıýdjet sýbsıdııalarynyń kólemi tanystyryldy. Jıyn qorytyndysy boıynsha Qoǵamdyq keńes usynylǵan ózgeristerdi qoldaǵan edi.
Alaıda máslıhattyń sheshimi jańa tarıfterdiń 1 qyrkúıekten bastap avtomatty túrde qoldanysqa engiziletinin bildirmeıdi. Jańa tarıfti engizý úshin qala ákimdiginiń tıisti qaýlysy shyǵýy qajet.
Eske salsaq, osyǵan deıin Astanada 20-ǵa jýyq avtobýs baǵyty ózgergeni habarlanǵan.
