Óskemen qutqarýshylary 10 gektarǵa jaıylǵan dala órtimen kúresýde
ÓSKEMEN. QazAqparat – Óskemen qalasynda qutqarýshylar 10 gektarǵa jaıylǵan dala órtimen kúresýde, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Óskemendegi «Zvezdnyı» saıajaı qaýymdastyǵynyń aýmaǵynda shóp órtengen.
«Qatty jeldiń saldarynan tilsiz jaý jeke turǵyn úıge jáne eki kólikke taralyp ketti. Aldyn ala derek boıynsha jalynnyń jalpy aýdany 10 gektardy quraıdy», - delingen aqparatta.
Oqıǵa ornyna 28 adam men 7 tehnıka jumyldyrylǵan. Órt sóndirýshilerge ekpini sekýndyny 15-20 metrge deıin jetetin jel kedergi keltirýde. Qazirgi ýaqytta olardyń úılesimdi is-qımyldarynyń nátıjesinde órttiń ary qaraı taralý qaýpi joıyldy.
Alaıda ot tolyqtaı aýyzdyqtalǵan joq. Órtpen kúres jalǵasyp jatyr.
Eske salsaq, osyǵan deıin ShQO-da bıyl 300-den astam dala órti shyqqanyn habarlaǵan edik.
