Óskemen kóshelerine kóktaıǵaqqa qarsy ne sebiledi
ÓSKEMEN. KAZINFORM – Óskemen qalasynyń kóshelerine kóktaıǵaqqa qarsy qum sebilmek.
Qala turǵyndary kóshelerge tuzdyń sebilýine qarsylyq bildirgen bolatyn. Olardyń aıtýlarynsha, tuz qoldanylatyn qospa kólik dóńgelekteri men aıaq kıimdi búldiredi.
Sondyqtan kóktaıǵaqqa qarsy materıal retinde tuzdy molynan paıdalanýdan bas tartyldy.
Qala kósheleri men joldaryn qys mezgilinde kútip-ustaýǵa «Taza Óskemen» kommýnaldyq kásiporny jaýapty. Bul týraly qalalyq TÚKSh, jolaýshylar kóligi jáne avtomobıl joldary bóliminde málim etti.
- Kóktaıǵaqtyń aldyn alý úshin negizgi materıal retinde qum paıdalanylmaq. Ol kólik júretin joldarǵa, jaıaý júrginshiler ótkelderine, aıaldamalar, kópirler, eńister men qıylystarǵa tógiledi. Sondaı-aq jaıaý júrginshiler júretin joldarǵa da erekshe nazar aýdarylady, - delingen aqparatta.
Eske salsaq, buǵan deıin ShQO joldarynda qys kezinde qaýipti 22 ýchaske bar ekendigi habarlanǵan.