Óskemen kóshelerindegi 300 kamera izdeýde júrgen adamdardy anyqtaıdy
ASTANA. KAZINFORM — ShQO-da beınekameralardyń kómegimen 150 qylmys ashyldy, dep habarlaıdy ІІM baspasóz qyzmeti.
Búginde óńirdegi qaýipsizdik kóshelerdegi polıtsııa qyzmetkerleriniń qatysýymen ǵana emes, jaǵdaıdy baqylaýǵa, taldaýǵa jáne jedel áreket etýge múmkindik beretin zamanaýı tehnologııalardyń kómegimen de qamtamasyz etiledi. Shyǵys Qazaqstan oblysynda beınebaqylaýdyń tsıfrlyq júıeleri polıtsııa jumysynyń mańyzdy quraldarynyń birine aınaldy.
— Osy jyldyń 10 aıynda beınebaqylaý kameralarynyń kómegimen 150 qylmys ashylyp, 23 462 ákimshilik quqyq buzýshylyq anyqtaldy. Tsıfrlyq júıeler jol júrisi qaǵıdalaryn buzýdan bastap, usaq buzaqylyq, qoǵamdyq oryndarda alkogoldik ishimdikter ishý jáne abattandyrý qaǵıdalaryn buzý derekterine deıin túrli quqyq buzýshylyqtardy tirkeıdi, — delingen habarlamada.
Búginde ShQO PD jedel basqarý ortalyǵy men aýmaqtyq bólimshelerdiń kezekshi bólimderine 9 myńnan astam beınekamera qosylǵan. Olar jedel jaǵdaıdy úzdiksiz baqylaýǵa, polıtsııa qyzmetkerlerine oqıǵalardy der kezinde anyqtap, oǵan qatysy bar adamdardy belgileýge kómektesedi.
Jumystyń jeke bir baǵyty — adamdardy bet-álpeti arqyly taný júıesi. Óskemen qalasynda mundaı fýnktsııasy bar 300 kamera jumys isteıdi. Jyl basynan beri osy júıeniń kómegimen izdeýde júrgen 198 adamnyń ornalasqan jeri anyqtaldy.
Tsıfrlyq baqylaýdyń artynda jedel basqarý ortalyǵy qyzmetkerleriniń kúndelikti eńbegi tur. Olar táýlik boıy habarlamalardy qabyldap, kelip túsken aqparatty taldaıdy, jedel jaǵdaıdy qadaǵalap, polıtsııa jasaqtarynyń jumysyn úılestiredi.
10 aı ishinde «102» pýltine 117 391 habarlama kelip túsken. Bul ótken jyldyń sáıkes kezeńimen salystyrǵanda 20,3%-ǵa az.
Qazirgi ýaqytta polıtsııa kómegine júginýdiń birneshe joly bar. Azamattar «102» nómirine qońyraý shala alady, «102» mobıldi qosymshasyn, Halyk jáne Kaspi qosymshalaryndaǵy «Zań men tártip» servısin nemese «SOS dabyl túımesi» júıesin paıdalana alady.
Tsıfrlandyrý qoǵamdyq tártipti qamtamasyz etý tásilin ózgertýde. Ol aqparatty jyldam alýǵa, oqıǵa ornyn naqty anyqtaýǵa jáne polıtsııa jasaqtarynyń jumysyn tıimdi uıymdastyrýǵa múmkindik beredi. Degenmen tehnologııa — eń aldymen qural. Al onyń nátıjeli bolýy mamandardyń kásibıligine baılanysty.
Sondyqtan árbir dabyl sıgnalynyń, tirkelgen quqyq buzýshylyq pen ashylǵan qylmystyń artynda Shyǵys Qazaqstan oblysynyń turǵyndary men qonaqtarynyń qaýipsizdigin qamtamasyz etý úshin táýlik boıy qyzmet atqaratyn polıtseılerdiń úılesimdi jumysy tur.
Buǵan deıin «Qyzyl-Jar» fýtbol klýbynyń eks-prezıdentine memleketaralyq izdeý jarııalanǵanyn jazǵanbyz.