Óskemen kóshelerinde manıak júrgeni jaıly aqparat — jalǵan

ÓSKEMEN. KAZINFORM — Óskemen qalasynda manıak júrgeni, onyń birneshe adamdy aǵashqa asyp tastaǵany jaıly jalǵan aqparat tarap jatyr.

Kesheli beri WhatsApp messendjerinde qala kóshelerinde manıaktyń paıda bolǵany jaıly aqparat tarap jatyr. Onda «Bul Óskemende bolǵan jaǵdaı. Manıak áli tabylmaı jatyr. Jasy 37-45 shamasynda. Adamdardy aǵashqa arqanmen asyp ketedi eken» dep jazylǵan. 

ShQO Polıtsııa departamenti baspasóz qyzmetiniń málimetine súıensek, bul aqparat shyndyqqa janaspaıdy. 

— Messendjerler men áleýmettik jelilerde taraǵan, Óskemen qalasynda manıaktyń bar ekendigi týraly aqparat shyndyqqa sáıkes kelmeıdi. Oblys aýmaǵynda mundaı faktiler tirkelgen joq. Polıtsııa azamattardy tek resmı aqparat kózderine senýge jáne jalǵan aqparatty taratpaýǵa shaqyrady, — delingen habarlamada.

Eske salsaq, osyǵan deıin Óskemen turǵynyn óltirgen er adam qylmysyn jasyrý úshin páterdi órtep jibergeni jaıly jazǵanbyz.