Óskemen kóshelerinde ıesiz ıtterdiń qaptap júrgenine kún saıyn 5 adam shaǵymdanady

ÓSKEMEN. KAZINFORM – Óskemen qalasynyń turǵyndary kóshelerde qańǵyrǵan ıtterdiń kóbeıip ketkenin aıtyp, dabyl qaǵyp jatyr. Kún saıyn quzyrly basqarmaǵa kem degende 5 adam shaǵymdanady.     

Óskemen kóshelerinde qaptaǵan ıtter máselesi áli de sheshimin tabar emes. Apta saıyn 10-ǵa jýyq adamdy ıt qaýyp jatyr. Qańǵyrǵan ıtter birneshe shaǵyn aýdan halqyn úreılendirip otyr.

- Ashyǵyn aıtqanda, dalaǵa shyǵýǵa qorqatyn boldyq. Ash ıtter tap beretindeı kórinedi. Bizdi qoıshy, balalardy obal ǵoı. Buryn ıt sany osynshama kóp bolmaıtyn. Bıyl erekshe qaptap ketkendeı, - deıdi Baqtııar esimdi Jibek matalar kombınaty shaǵyn aýdanynyń turǵyny.

Shyǵys Qazaqstan oblysy Veterınarııa basqarmasynyń málimetine súıensek, kún saıyn ıesiz ıtterdiń qaptap júrgenine kem degende 5 adam shaǵymdanady.

- Qala turǵyndary bizge habarlasyp, qańǵyrǵan ıtterdiń qaptap ketkenine narazylyq bildirip jatady. Janýarlar quqyǵyn qorǵaýshylardan da shaǵymdar túsip jatyr. Máselen, bizdiń mamandar shaǵyn aýdandarǵa barǵanda basqa bireýler atyp ketken ıtterdi tabady. Álbette, olar ólekselerdi jınap alady. Sol kezde qolyna kamera ustaǵan adamdar atyp shyǵyp, «Itterdi atyp jatyr» dep baıbalam salady. Óskemende dál osyndaı 10 oqıǵa boldy. Qazir sol boıynsha tergeý bastaldy, - deıdi Shyǵys Qazaqstan oblysynyń Veterınarııa basqarmasynyń basshysy Ramıl Saǵandyqov.

Onyń aıtýynsha, ótken jyly kóshe kezgen ıtterdiń tym kóbeıip ketkeni jaıly turǵyndardan 2 myńnan astam shaǵym túsken.

Eske salsaq, buǵan deıin Óskemende ıtin úıde jalǵyz qaldyryp ketken áıelge 40 myń teńge aıyppul salynǵany habarlanǵan.