Óskemen kóshelerin tútin basýy: Tıtan magnıı kombınatynda shtattan tys jaǵdaı bolǵan
ÓSKEMEN. KAZINFORM – Óskemendegi Tıtan magnıı kombınaty ornalasqan shaǵyn aýdandy tútin basýyna baılanysty jedel shtab otyrysy ótti.
Qazir kásiporyn aýmaǵynda Tótenshe jaǵdaılar mınıstrligi Ónerkásiptik qaýipsizdik komıteti departamentiniń jáne ShQO Ekologııa departamentiniń ókilderi oblystyq prokýratýranyń qoldaýymen tekserý jumystaryn júrgizip jatyr. Tekseris barysy men nátıjesi oblys basshylyǵynyń jáne «Óskemen tynysy» ekologııalyq qorǵanys bıýrosynyń jeke baqylaýynda.
Shyǵys Qazaqstan oblysynyń ákimi Nurymbet Saqtaǵanov «ÝK TMK» AQ basshylyǵymen kezdesip, jedel shtab otyrysyn ótkizdi. Anyqtalǵandaı, aýaǵa taraıtyn zııandy qaldyqtardyń ruqsat etilgen shekten asýy tirkelmegenimen, kásiporynda shynymen de shtattan tys jaǵdaı bolǵan.
– 19 mamyr kúni kombınatta №3 hlorlaý qondyrǵysynyń kondensatsııa júıesin jospardan tys profılaktıkalyq tazalaý jumystary júrgizilgen bolatyn. Jumys barysynda garnısaj qulap, saldarynan gazoótkizgish bitelip qalǵan. Bizdiń synaq zerthanasynyń mamandary sanıtarlyq-qorǵaý aımaǵynyń shekarasynda aýadaǵy hlor mólsherin ár eki saǵat saıyn tekserip otyrdy. Ruqsat etilgen shekten asý tirkelgen joq, – deıdi «ÝK TMK» AQ ónerkásiptik qaýipsizdik, eńbek qorǵaý jáne qorshaǵan ortany qorǵaý basqarmasynyń bastyǵy Rınat Ámirov.
ShQO ákimi bul oqıǵa osyndaı jaǵdaılar týyndaǵanda qalaı áreket etýdiń kezeń-kezeńimen júzege asatyn algorıtmin ázirleý qajettigin kórsetkenin aıtty. Sonymen qatar barlyq óndiristik kásiporyndarda tıisti oqý-jattyǵýlar ótkizilýi kerek.
– Tótenshe jaǵdaılar kezinde ashyqtyqty qamtamasyz etip, halyq arasynda dúrbeleń týdyrmaı, naqty ári ýaqytyly aqparat berý óte mańyzdy. Jalǵan aqparattyń taralýyna jol berilmeýi tıis, – dedi Nurymbet Saqtaǵanov.
Eske salsaq, osyǵan deıin Óskemende jelide taraǵan vıdeodan soń ekologtar tekserý júrgizgeni habarlanǵan.