Óskemen kóshelerin tútin basty: Arnaıy oblystyq shtab qurylyp, baqylaý kúsheıtildi
ÓSKEMEN. KAZINFORM – Óskemendegi Tıtan magnıı kombınaty ornalasqan shaǵyn aýdandy tútin tumshalap ketýine baılanysty tekserý júrgizildi.
Keshe ShQO Ekologııa departamentiniń mamandary Óskemendegi Tıtan magnıı kombınaty ornalasqan shaǵyn aýdanda hlordyń shekti ruqsat etilgen kontsentratsııadan asyp ketý faktisin tirkegen bolatyn.
Osyǵan baılanysty oblystyq shtab qurylyp, sol jerde jumys istep jatyr. Másele ShQO ákimdiginiń baqylaýyna alynǵan.
- Mamandar barlyǵy 8 jerden 144 aýa synamasyn aldy. Synamalarǵa 18 túrli zat boıynsha saraptama jasaldy. Olardyń ishinde hlor, tuz qyshqyly, kúkirt dıoksıdi, formaldegıd, ammıak, qorǵasyn sekildi zııandy elementter boldy. Saǵat 21:44-ke deıin júrgizilgen zertteý nátıjesinde, birde-bir zattyń shekti mólsherden aspaǵany anyqtaldy. Bul málimetter oblystyq Ekologııa departamentine joldandy, - dep habarlady ShQO Óńirlik kommýnıkatsııalar qyzmetinen.
Eske salsaq, osyǵan deıin Óskemende jelide taraǵan vıdeodan soń ekologtar tekserý júrgizgeni habarlanǵan.