Óskemen kóshelerin nege tútin basyp tur - Qazgıdromet ókili jaýap berdi

ÓSKEMEN. KAZINFORM – «Qazgıdromet» RMK Shyǵys Qazaqstan jáne Abaı oblystary boıynsha aýa raıy boljamdary bóliminiń basshysy Lıýbov Býhtoıarova Óskemendi nege tútin basyp turǵanyn aıtyp berdi.

Búgin tańerteń turǵyndar qala kóshelerin qoıý tútin tumshalap turǵanyn baıqady.

– Ótken demalys kúnderi óńirde jyly aýa raıy baıqaldy. Al onyń artynan sýyq frontaldy aımaqtar keldi. 27-28 qazan kúnderi qalada jańbyr jaýdy, al oblys aýmaǵyna sýyq ári turaqty antıtsıklon ornady, ıaǵnı ylǵaldy ári sýyq aýa massasy qalyptasty. Aýa temperatýrasynyń tómendeýi, ylǵaldyń joǵarylaýy jáne jelsiz aýa raıy - osynyń bári tómengi aýa qabattarynda sý býynyń kondensatsııalanýyna áser etti. Sonyń nátıjesinde búginde qalada tuman baıqalyp otyr, - deıdi «Qazgıdromet» RMK Shyǵys Qazaqstan jáne Abaı oblystary boıynsha meteorologııalyq boljaý bóliminiń bastyǵy. 

Onyń aıtýynsha, aldaǵy táýlikte de osyndaı aýa raıy saqtalady. 

– ıAǵnı erteń de Óskemende tuman kútiledi. Kúndizgi aýa temperatýrasy sýyq bolyp qala beredi. Aýa raıy juma kúni ózgeredi dep kútip otyrmyz. Juma jáne senbi kúnderi aýa temperatýrasy joǵarylap, ońtústik-shyǵystan jel soǵyp, tuman birtindep seıiledi, - deıdi Lıýbov Býhtoıarova. 

Eske salsaq, osyǵan deıin Óskemende aýa sapasynyń nasharlaýynan keıin 4 adam aýyrǵany habarlanǵan.