Óskemen kóshelerin taýdan kelgen qarǵyn sý basyp jatyr
ÓSKEMEN. QazAqparat - Óskemenniń kóshelerinde sý kólkip júr. Mamandar jańbyr men erigen qar sýy taýdan aǵyp kelip jatqanyn aıtady, dep habarlaıdy QazAqparat tilshisi.
«Kóshede kólikter júzip júr» degen taqyryppen ýatsap messendjeri arqyly túrli vıdeolar tarap jatyr. Shynymen de qala kóshelerinde jaıaý adam túgil kólikpen júrýdiń ózi qıyndap ketken. Qalanyń tazalyǵyna jaýapty mekeme mamandary mólsherden tys sýdy taratýǵa jerasty qudyq jelileriniń shamasy jetpeı jatqanyn aıtady.
«Jańbyr men qar sýyna taýdan qulaǵan laısań qosylýda. Munshama sýdy jerasty toraptary taratyp úlgermeıdi. Jibek joly men Sátbaev dańǵylynyń qıylysyndaǵy sý Sheshek asýynan jetkeni anyqtaldy. Al Krasın kentiniń Pýshkın kóshesindegi qarǵyn sý Botbaı jotasynan aǵyp kelgen. Shmelev log eldi mekeninen aqqan sý tramvaı relsterin, Myzy jáne Pıter kommýnarlary kóshesine jaıyldy. Maldybaev kóshesi men Samsonov kentinde birneshe otbasy qaýipsiz jerge kóshirildi. Sý sorǵysh tehnıkalar úlgermeı jatyr» - deıdi «Óskemen tártip» mekemesiniń dırektory Tamara Rahymjanova.
Onyń aıtýynsha qala aýmaǵynda 80-nen astam qutqarýshy, 26 greıder men frontaldy tıeýish tehnıka qarǵyn sýmen kúreske jumyldyrylǵan. Merdiger kompanııalarmen qatar «Óskemen vodokanal» mekemesiniń tehnıkasy da tartylýda.
Eki kún boıy toqtamaı jaýǵan jańbyrdyń sońy qazir qarǵa ulasa bastady.
Fotolardy Tileýbek Shaıahmetov túsirgen
