Óskemen qalasynyń joldary qysqa qanshalyqty daıyn
ÓSKEMEN. KAZINFORM – Sanaýly kúnderden keıin qylyshyn súıretken qys ta keledi. Al Óskemen qalasynyń joldary qysqa qanshalyqty daıyn? Kazinform tilshisi bul saýaldyń jaýabyn bilip kórdi.
Qala aýmaǵyn qys mezgilinde kútip-ustaýmen «Taza Óskemen» KMK aınalysady. TÚKSh, jolaýshylar kóligi jáne avtomobıl joldary bólimi men atalǵan kásiporyn arasynda bekitilgen shartqa sáıkes, olar negizgi jáne qosymsha joldardy, aıaldamalardy, kıylystar men jaıaý jýrginshiler joldaryn qardan tazalap otyrady.
«Qazirgi tańda «Taza Óskemen» KMK-de 97 tehnıka bar. Memlekettik satyp alý arqyly jasalǵan sharttarǵa sáıkes qum – 2 000 tekshe metr, janar-jaǵarmaı materıaldary – 200 tonna, kóktaıǵaqqa qarsy materıal – 1 500 tonna kóleminde alynǵan. Bul materıaldar qajettiligine qaraı kásiporynǵa jetkizilip otyrady», - deıdi Óskemen qalalyq TÚKSh, jolaýshylar kóligi jáne avtomobıl joldary bólimi basshysynyń orynbasary Erjan Ibraev.
Kásiporynda 43 júrgizýshi, 38 mehanızator jáne 218 sanıtarlyq tazalaý qyzmetkeri jumys isteıdi. Ótken jyly qala terrıtorııasynan 127 949,7 tekshe metr qar shyǵarylǵan.
«Sońǵy jyldary kásiporyn quramyna 10 aralas jol mashınasymen 2 frontaldi tıegish aýyr júk kólikteri satyp alyndy. Qalyń qar mezgilinde tehnıkalyq sıpattamalarǵa sáıkes aldymen bastapqy joldar men kosalqy joldar tazalanyp, kelesi rette jaıaý júrginshiler joldary, aıaldamalar syndy mańyzy bar ýchastkeler tazalanady», - deıdi E.Ibraev.
ShQO tótenshe jaǵdaılar departamentiniń málimetine súıensek, óńir boıynsha qys mezgiline 1717 adam men 686 tehnıka saqadaı saı. Sonymen qatar departamentte apattyq-qutqarý jáne evakýatsııalaý jumystaryn júrgizý úshin 114 releftik tehnıka ázir tur.
Eske salsaq, osyǵan deıin Túrkistan oblysyndaǵy joldardyń qysqa daıyndyǵy jaıly jazǵan bolatynbyz.
