Óskemen qalasynyń prokýrory ýaqytsha qyzmetinen shettetildi

ÓSKEMEN. KAZINFORM – Óskemen qalasynyń prokýrory Tımýr Chakpantaev ýaqytsha qyzmetinen shettetildi. Bul týraly Shyǵys Qazaqstan oblystyq prokýratýrasy habarlady.

Buǵan deıin BAQ pen áleýmettik jelilerde prokýrorǵa qatysty qylmystyq is qozǵaldy degen aqparat taraǵan bolatyn. Onyń esimi ózine baǵynyshty qyzmetkerlerdi soqqyǵa jyqty degen kúdikpen atalǵan. Polıtsııa ázirge bul aqparatqa túsinikteme bergen joq, alaıda oblystyq prokýratýra mundaı istiń bar ekenin rastady.

Resmı málimetke sáıkes, prokýrorǵa qatysty qyzmettik tergeý júrgizilip jatyr.

– Qazaqstan Respýblıkasynyń «Quqyq qorǵaý qyzmeti týraly» Zańyna sáıkes, Óskemen qalasynyń prokýrory jaýapkershilik týraly sheshim qabyldanǵanǵa deıin ýaqytsha qyzmetinen shettetildi, – delingen oblystyq prokýratýra habarlamasynda.

Vedomstvo ókilderi buǵan deıin de prokýratýra qyzmetkerlerine qatysty qyzmettik tekserister júrgizilgenin atap ótti. Sol tekserýlerdiń nátıjesinde keıbir faktiler rastalyp, qyzmettik etıka normalaryn buzǵan qyzmetkerler tártiptik jaýapkershilikke tartylǵan.

Eske salaıyq, buǵan deıin Aqtaý qalasynyń prokýrory Erbolat Ábdirov usaq buzaqylyq jasaǵany úshin kináli dep tanylǵan bolatyn.