Óskemen qalasynyń ákimi Jaqsylyq Omar qyzmetinen ketti
ÓSKEMEN. KAZINFORM — Óskemen qalasynyń ákimi Jaqsylyq Omar qyzmetinen ketti. Bul týraly Jaqsylyq Omar áleýmettik jelidegi paraqshasynda jazdy.
— Alty jyl degen az ýaqyt emes, kóp te ýaqyt emes. Osy aralyqta sizdermen birge qalanyń ystyǵyna kúıip, sýyǵyna tońyp, shama-sharqymyz kelgenshe qyzmet atqardyq. Qala basshysy laýazymyndaǵy qyzmetim támamdalýda. Osynaý kórikti shahar — Óskemen qalasynyń turǵyndaryna, el basshylyǵyna maǵan senim bildirgenderińiz úshin rızashylyǵymdy bildiremin, - dedi ol.
Jaqsylyq Omar óz sózinde qala halqyna alǵysyn aıtyp, Óskemenniń odan ári damı beretinine senim bildirdi.
Aıta keteıik, Jaqsylyq Omar Óskemen qalasynyń ákimi laýazymyna 2018 jyldyń tamyz aıynda taǵaıyndalǵan.
Eske salsaq, osyǵan deıin Serik Sápıevtiń jańa qyzmetke kiriskenin habarlaǵan edik.