Óskemen halqy turaqtandyrý qorynyń azyq-túligin jappaı satyp alyp jatyr

ÓSKEMEN. QazAqparat – Óskemen qalasyndaǵy turaqtandyrý qory pavılondaryna jetkiziletin azyq-túlik jyldam taýsylyp qalyp jatyr. Sebebi arzan baǵadaǵy ónimderdi halyq jappaı satyp alyp jatyr, dep habarlaıdy QazAqparat tilshisi.

Búginde qaladaǵy turaqtandyrý qory pavılondarynda azyq-túlik tapshylyǵy joq. Jemis-jıdek pen kókónister aptasyna 3 ret jetkizilýde. Alaıda ónimderdi halyq jappaı satyp alyp jatyr. Sebebi ondaǵy azyq-túliktiń baǵasy naryqtaǵydan áldeqaıda arzan.

«Jemister men kókónisterdiń sapasyna qatysty turǵyndardyń barlyq aryzdary jedel qaralýda. Osyǵan deıin 5 shaǵym túsken. Qandaı da bir buzýshylyqtar anyqtalǵan jaǵdaıda dereý tıisti sharalar qabyldanýda», - deıdi Óskemen qalalyq kásipkerlik bóliminiń basshysy Ǵasan Turǵanbaev.

Pavılondardan bólek, iri sýpermarketterde arnaıy sóreler qoıylǵan. Onda sábiz, kartop, qyryqqabat pen pııazdyń kelisi 82 teńgeden satylýda. Bul naryqtaǵy baǵadan úsh-tórt ese tómen.

Esterińizge sala ketsek, osyǵan deıin Óskemende áleýmettik nannyń baǵasy qymbattamaıtynyn habarlaǵan edik.