Óskemen halqyn 1 mlrd teńge shyǵynǵa batyrǵan qurylys kompanııasynyń basshysy sottaldy

ÓSKEMEN. KAZINFORM – Óskemende úsh turǵyn úı salamyn dep halyqtan bir mlrd teńgeden astam qarajat jınap alǵan qurylys kompanııasynyń ıesine sot úkimi shyqty.

 

Belgili bolǵandaı, 2021 jyldyń naýryz aıynda kásipker óziniń kompanııasy týraly jalǵan kiris anyqtamasyn áleýmettik-kásipkerlik korporatsııaǵa (ÁKK) tapsyrǵan.

- Osy jalǵan málimetterdiń negizinde ol ÁKK-den qurylysqa dep 206 mln teńge kóleminde qarjy alǵan. Alaıda keıin qurylys materıaldarynyń qymbattaýy men bıýdjet tapshylyǵyn alǵa tartyp, bolashaq páter ıelerinen qosymsha qarajat jınaı bastaǵan, - delingen aqparatta.

Alaıda qurylys sol kúıi aıaqtalmaǵan. Al jınalǵan qarjy ushty-kúıli joǵalyp ketken. Sot kásipkerdi asa iri kólemde alaıaqtyq jasaǵany úshin kináli dep tanyp, 6 jyl 8 aıǵa bas bostandyǵynan aıyrdy.

Eske salsaq, osyǵan deıin ShQO-da aqsha bopsalaǵan 3 polıtseı sottalǵany habarlanǵan.