Óskemen halqy qardyń durys tazalanbaı jatqanyna narazylyq bildirdi

ÓSKEMEN. KAZINFORM – Óskemen qalasyndaǵy Ablaketka shaǵyn aýdanynyń turǵyndary kóshelerdegi qardy tazalaý jumystarynyń sylbyrlyǵyna shaǵymdandy.

Ablaketka shaǵyn aýdanynda kólik joly tarylyp, jaıaý júrginshiler jolyn qar basyp qalǵan.

- Kóshelerde kólikpen júrý muń boldy. Joldyń tar bolǵany sonsha, keıde qarsy jolaqtaǵy kólikke soǵylyp qala jazdaısyń. Avtobýstardyń júrýi tipten qıyn, - deıdi turǵyndar.

Qala ákimi halyqtyń shaǵymy durystyǵyn aıtyp, kommýnaldyq qyzmetterdiń jumysyn synǵa aldy.

- Jol jıekterine qar jınalyp, sonyń saldarynan joldar tarylyp jatyr. Qardy jaı ǵana ıterip qoımaı, ony tolyǵymen alyp tastaıtyn tehnıkalardy alý qajet. Kelesi jyly bul másele qaıtalanbaýy kerek. Tazalaý kezinde mektepterge, aýrýhanalarǵa jáne basqa da áleýmettik nysandarǵa kireberis joldar basty nazarda bolýy tıis, - dedi Óskemen qalasynyń ákimi Almat Aqyshov.

Eske salsaq, buǵan deıin Óskemendegi kópirdiń astynan er adamnyń máıiti tabylǵany habarlanǵan.