Óskemen ǵalymdary jasap shyǵarǵan tıtan ımplanttar otaǵa qoldanyla bastady

ASTANA. KAZINFORM – Ǵylym jáne joǵary bilim mınıstri Saıasat Nurbek Úkimet otyrysynan keıin ótken baspasóz máslıhatynda tıtannan jasalǵan otandyq ımplanttardy tanystyrdy.

- Biz tıtan óndirýden álemde joǵary orynda turǵanymyzben, odan jasalatyn buıymdar men quraldardyń 90 paıyzdaıyn syrttan ákelemiz. Sondyqtan Shyǵys Qazaqstan tehnıkalyq ýnıversıteti Óskemendegi Úlbi metallýrgııalyq zaýytymen birigip, tıtannan medıtsınalyq buıymdar jasaı bastady. Bizge densaýlyq saqtaý mınıstrligi óte úlken qoldaý bildirdi. Óıtkeni medıtsınalyq buıymdardy sertıfıkattaý, klınıkalyq testileý protsesteri kóp. Astanadaǵy N.Bátpenov atyndaǵy Ulttyq travmatologııa jáne ortopedııa ǵylymı ortalyǵy osy buıymdardy tez arada klınıkalyq testileýden ótkizip, 91 ota jasady. Eki buıym tolyqqandy sertıfıkattaýdan ótti. Onyń biri – jambas býynyna arnalǵan dısk. Bul buıymmen 20 ota jasaldy. Ekinshisi – omyrtqa saqınasy. Osy kúnge deıin 25 otaǵa qoldanyldy, - dedi ol.

Saıasat Nurbektiń aıtýynsha, tıtan – bıologııalyq ınertti materıal. ıAǵnı, denege kiriktirilgende reaktsııa bermeıdi, shirimeıdi.

- Jalpy Shyǵys Qazaqstan tehnıkalyq ýnıversıteti tıtannan 20-dan astam buıym jasap shyǵardy. Onyń ekeýi sertıfıkattaýdan ótkenin aıttyq. Taǵy tórt buıym klınıkalyq testileýdiń aqyrǵy kezeńderinen ótip jatyr. 14 buıym klınıkalyq testileýge endi kiredi. Qazirdiń ózinde jasalǵan buıymdar tıtan ımplanttarǵa degen ishki qajettiliktiń 10 paıyzyn jabady. Aldaǵy 3-4 jylda tolyq 100 paıyz jabamyz degen esebimiz bar, - dedi mınıstr.

Mınıstrdiń aıtýynsha, eldegi 25,5 myń ǵalymnyń 54 paıyzy — 40 jastan asqandar.