Óskemen bıligi kómir tapshylyǵyna qatysty qaýesetti joqqa shyǵardy
ASTANA. QazAqparat - Óskemende kómir tapshylyǵyna qatysty qaýesetterge qaramastan, qoımalarda kommertsııalyq jáne jeńildetilgen baǵada qatty otyn jetkilikti. Bul týraly qala ákimdiginiń Facebook-tegi resmı paraqshasynda aıtylǵan, dep habarlaıdy «QazAqparat» HAA.
Naqtyraq aıtqanda, «QTJ» AQ-nyń Zaşıta bólimshesiniń ókilderi vagondardyń jetip artylatynyn, kómir jetkizýde eshqandaı máseleniń joqtyǵyn habarlaǵan.
«Shynyna kelgende kómirdiń mólsheri ótken jylmen salystyrǵanda kóbirek jetkizilgen», - delingen «QTJ» AQ aqparatynda.
Dese de, jeńildetilgen kómirdi alýǵa quqyly keıbir adamdar tasymal turǵysynan máseleniń baryn jetkizgen. Atalǵan jaǵdaıǵa baılanysty baǵdarlamanyń úılestirýshisi, qalalyq ardagerler keńesiniń tóraǵasy Sergeı Denıakın túsinikteme berdi.
«Iá, keıde Zaşıtadaǵy kómirge baılanysty Sol jaǵalaýda da, Bazovaıa kóshesinde de keptelister týyndap jatady. Qalaǵa jaqyn eldimekenderdiń halqy men shahardaǵy keıbir uıymdar qarasha aıy úshin kómirdi aldyn ala alyp qoıatyndyqtan, osyndaı jaǵdaılar týyndaıdy. Sonymen birge, áleýmettik turǵyda az qamtylǵandar erterek eskertilse de, kómirge qol jetkizýde sońyna deıin iske kirispeı jatady», - deıdi Sergeı Denıakın.
Degenmen, aǵymdaǵy jyldyń 4 tamyzynda qala ákimdigi men «Qarajyra» JShS arasynda qol qoıylǵan memorandýmǵa sáıkes, áleýmettik az qamtylǵan otbasylarǵa arnalǵan 35 myń tonna kómirdiń 27 myń tonnasy taratylyp qoıǵan. Kómirdiń jeńildetilgen baǵasy boıynsha tonnasy 7600 teńgeden satylady. Kommertsııalyq turǵyda saýdalanatyn 230 myń tonna kómirdiń 188 myń 718 tonnasy (nemese 80 paıyzy) satylyp ketken.
