Óskemen avtobýstarynda elektrondy bıletteý júıesi mamyrda iske qosylady
ÓSKEMEN. QazAqparat – Óskemen qalasyndaǵy qoǵamdyq kólikterde elektrondy bıletteý júıesi mamyr aıynda iske qosylmaq, dep habarlaıdy QazAqparat tilshisi.
Jańa júıe iske qosylǵanda shahardaǵy avtobýstarda jol aqysy 90 teńge bolyp qala beredi. Bul jaıly baspasóz máslıhatynda «Jolaýshylar tasymalyn basqarý ortalyǵy» JShS dırektory Abı Álmenbetov málim etti.
«Qalalyq avtobýs marshrýttarynda elektrondy bıletteý júıesi mamyr aıynyń basynda júzege asyrylady. Al jol aqysynyń qazirgi tarıfi saqtalady. ıAǵnı, eresekterge bılet baǵasy – 90 teńge, balalarǵa – 45 teńge. Al aqshalaı esep aıyrysý kezinde bılet quny avtobýstarda 130 teńge, tramvaılarda 120 teńgeni quraıdy», - dedi ol.
Esterińizge sala ketsek, osyǵan deıin Óskemen avtobýstarynda elektrondy bıletteý júıesi iske qosylatyndyǵyn habarlaǵan bolatynbyz.
