Óskemen áýejaıy qazan aıynda jumysyn qaıta bastaıdy
ÓSKEMEN. QazAqparat – Óskemen qalasynyń áýejaıy birinshi qazan kúni jumysyn qaıta bastaıdy, dep habarlaıdy QazAqparat tilshisi.
ShQO ákimi Danıal Ahmetov Óskemen áýejaıyndaǵy rekonstrýktsııalaý jumystarynyń barysymen tanysty. Onyń aıtýynsha, jumys qarqyny belgilengen kesteden jyldamyraq júrgizilýde. Jaqyn arada munda jaryqtandyrý jabdyǵy ornatylyp, tehnıkalyq qyzmetterdiń bir bóligi ornalasatyn ǵımarat salynady.
«Áýejaıdy jańǵyrtý barysynda eski ushý-qoný jolaǵyna jańa ári zamanaýı jabyn tóseldi. Sonymen qatar onyń uzyndyǵy 2800 metrge, eni 60 metrge deıin keńeıtildi. Jańa ushý-qoný jolaǵy álemdik standarttarǵa sáıkes keledi jáne joǵary klastaǵy ushaqtardy qabyldaýǵa, baǵyttar sanyn ulǵaıtýǵa múmkindik beredi», - dedi aımaq basshysy.
Qazir qalaǵa áýejaılardy sertıfıkattaıtyn arnaıy komıssııa kelgen. Sondaı-aq azamattyq avıatsııa komıteti mamandarynyń basshylyǵymen áýejaıdyń ushý-qoný jolaǵy arnaıy tekserýden ótkiziledi.
«Óskemen áýejaıy sońǵy ret 1996 jyly jóndelgen. Bıyl qazan aıynyń 1-i kúni áýejaı óz jumysyn qaıta bastaıdy», - dedi D.Ahmetov.
