Óskemen áýejaıynan 140 mln teńgeden astam qarajat jymqyrǵandarǵa sot úkimi shyqty

ÓSKEMEN. KAZINFORM — Óskemen qalasynyń qylmystyq ister jónindegi mamandandyrylǵan aýdanaralyq soty «Óskemen áýejaıy» AQ-nyń burynǵy basshylaryna qatysty úkim shyǵardy.

Áýejaıdyń burynǵy prezıdenti men atqarýshy dırektory qyzmettik ókilettikterin paıdalana otyryp, birneshe ret asa iri kólemde senip tapsyrylǵan múlikti talan-tarajǵa salǵan. 

Sondaı-aq materıaldyq-tehnıkalyq jabdyqtaý tobynyń basshysy senip tapsyrylǵan múlikti ıemdený jáne ysyrap etý deregi boıynsha sotqa tartyldy. 

— Sot barysynda anyqtalǵandaı, 2018-2023 jyldar aralyǵynda aıyptalýshylar azamattyq-quqyqtyq sıpattaǵy sharttar jasaý arqyly merdiger uıymdarǵa tólenetin shyǵyndardy negizsiz arttyryp otyrǵan. Shartta kórsetilgen soma men naqty tólem arasyndaǵy aıyrmany óz paıdalaryna jaratqan. Sot kezinde olar óz kinálaryn tolyq moıyndamady, — dep habarlady Óskemen qalasynyń qylmystyq ister jónindegi aýdanaralyq sotynan.

Sot úkimimen áýejaıdyń prezıdenti QR QK-niń 361-baby 4-bóligi 3-tarmaǵy jáne 189-baby 4-bóligi 2-tarmaǵymen kináli dep tanylyp, 8 jylǵa túrmege qamaldy. Odan «Óskemen áýejaıy» AQ-nyń paıdasyna 120 mln teńgeden astam qarajat óndirildi.

Atqarýshy dırektor 7 jylǵa bas bostandyǵynan aıyrylsa, materıaldyq-tehnıkalyq jabdyqtaý tobynyń basshysy 1 jylǵa shartty túrde sottaldy. Ekeýinen 2 mln teńgeden astam materıaldyq shyǵyn óndirildi.

Budan bólek, sot áýejaı prezıdenti men atqarýshy dırektordan taǵy 19 mln teńgege jýyq qarajatty óndirý týraly sheshim shyǵardy. Úkim áli zańdy kúshine engen joq.

Eske salsaq, osyǵan deıin Aqtóbede avıazaýyttyń eks-basshysy 110 mln teńge jymqyrdy degen kúdikke ilingeni habarlanǵan.