Óskemen áýejaıy ázirge satylmaıtyn boldy

ÓSKEMEN. KAZINFORM – Keıingi kúnderi áleýmettik jelide qyzý talqylanǵan Óskemen áýejaıyn jekeshelendirýge qatysty túsinikteme berildi. 

Óńir bıligi áýejaıdyń rasymen de Úkimettiń № 908 qaýlysymen jekeshelendirýge jatatyn aktıvter tizimine engizilgenin rastady. Alaıda strategııalyq sebepterge baılanysty bul protsess ázirge toqtatylǵan.

«Ertis ÁKK» AQ málimetinshe, daıyndyq jumystary buryn bastalyp ketken.

– 2025 jyldyń qańtarynda nysannyń naryqtyq qunyn táýelsiz baǵalaý júrgizildi. Áýejaı 2021-2025 jyldarǵa arnalǵan jekeshelendirý josparyna resmı túrde engizilgen, - dep habarlady kompanııadan.

Alaıda Memleket basshysynyń Joldaýy jarııalanyp, jalpyulttyq jospar bekitilgennen keıin bul másele qaıta qaraldy. Jaqyn arada oblysta eki jańa áýejaı, atap aıtqanda Katonqaraǵaı jáne Zaısan aýdandarynda iske qosylýy tıis.

– Bul áýejaılar týrızmdi damytý jáne óńir ekonomıkasyn ilgeriletý úshin strategııalyq mańyzǵa ıe. Dál osy eki jańa nysannyń ashylýy jekeshelendirý merzimin qaıta qaraýǵa sebep boldy, - delingen aqparatta.

«Ertis ÁKK» AQ ókilderi qazir óńirdegi áýe ınfraqurylymyn túgeldeı biryńǵaı basqarý ortalyǵynda ustaý qajettigin túsindirdi.

– Jańa áýejaılardyń tolyqqandy jumys isteýi úshin jolaýshylar men áýe kompanııalaryna qyzmet kórsetýdiń birizdi standarttary, qaýipsizdik júıesi, ushý-qoný jolaqtarynyń tehnıkalyq kútimi, navıgatsııa jáne arnaıy tehnıka boıynsha ortaq talaptar bolýy shart. Bul fýnktsııalardy qoldanystaǵy operator – «Óskemen áýejaıy» AQ-ǵa júkteý eń tıimdi sheshim, - dep habarlady kompanııadan.

Sondyqtan ShQO ákimi jekeshelendirýdi 2027-2028 jyldarǵa shegerý jóninde Kólik mınıstrine resmı hat joldaǵan. Bul usynysty mınıstrlik te, Básekelestikti qorǵaý jáne damytý agenttigi de qoldaǵan.

Eske salsaq, osyǵan deıin Balqash áýejaıyn rekonstrýktsııalaýǵa qaıtarylǵan aktıvter esebinen 945 mln teńge bólingeni habarlanǵan.