Óskemen áýejaıy avıaotynǵa monopolııalyq joǵary baǵa qoıǵany úshin aıyppul arqalady
ÓSKEMEN. KAZINFORM — Óskemen áýejaıyna avıatsııalyq otynǵa monopolııalyq joǵary baǵa qoıǵany úshin aıyppul salynyp, sodan túsken tabysy memleket kirisine tárkilendi.
Tekserý nátıjesi men basqa da antımonopolııalyq sharalar týraly Óńirlik kommýnıkatsııalar qyzmetinde ótken brıfıngte Básekelestikti qorǵaý jáne damytý agenttigi ShQO boıynsha departamentiniń basshysy Sáýle Baqbergen málim etti.
— Óskemen áýejaıy avıatsııalyq otynǵa monopolııalyq joǵary baǵa belgilegeni úshin ákimshilik jaýapkershilikke tartyldy. Jalpy jyl ishinde naryqtyń alty sýbektisi jaýapqa tartylǵan. Salynǵan aıyppuldardyń jalpy somasy — 10,1 mln teńge. 10 mln teńge kólemindegi monopolııalyq tabys memleket kirisine tárkilendi, — dedi ol.
Áleýmettik mańyzy bar resýrstar baǵasynyń negizsiz ósýine jol bermeý úshin antımonopolııalyq organ kómir naryǵy boıynsha eki eskertý jasaǵan.
Tekserýlerden bólek, departament mamandary aldyn alý baǵytynda da belsendi jumys atqaryp keledi. 2025 jyly taýar satylymyna qatysty naryqqa 17 taldaý júrgizilip, azyq-túlik taýarlaryn jetkizýshilermen 18 antımonopolııalyq komplaens-kelisim jasaldy.
Ekonomıkadaǵy memlekettiń úlesin azaıtýǵa da erekshe nazar aýdarylǵan. Óńirde memlekettik kásiporyndardyń qyzmetine 47 monıtorıng júrgizildi. Sonyń nátıjesi boıynsha 7 nusqama berilip, barlyǵy tolyq kólemde oryndaldy. Sonymen qatar kedergilerdi joıý jónindegi keńes alańynda bıznestiń alty máselesi jergilikti deńgeıde sheshimin tapty.
Eske salsaq, osyǵan deıin Qyrǵyzstanda medıtsınalyq bilimge memlekettik monopolııa engiziletindigi habarlanǵan.