Óskemen aspanyn taǵy da túnergen bult torlady
ÓSKEMEN. QazAqparat - Óskemen aspanyn taǵy da túnergen bult torlap, nóser jaýyn jaýyp, naızaǵaı jarqyldap, kún kúrkiredi, dep habarlaıdy «QazAqparat» HAA tilshisi.
Buǵan deıin Qazgıdromet boljamy boıynsha 19 shilde kúni Shyǵys Qazaqstan oblysynda jeldiń uıytqýy sekýndyna 25 metrge deıin artatyndyǵy eskertilgen habarlama taratylǵan bolatyn. Budan ózge, meteorologtar naızaǵaı jarqyldap, burshaq jaýýy múmkin ekendigin de eskertken. Sınoptıkter boljamy dál keldi. Qazir kommýnaldyq qyzmetter daýyl kezinde tamyrymen opyrylyp túsken taldar men metall qurylymdarynan qalany tazartý jumystaryn jalǵastyryp jatyr. Energetıkter elektr berý jelileriniń úzilgen tustaryn joıýda. Arnaıy qurylǵan oblystyq komıssııa kútpegen apat saldarynan keltirilgen materıaldyq shyǵyndar esebin shyǵarýǵa kiristi.
Aıta keteıik, «112» jáne «101» jelilerine Óskemen qalasy men qala mańyndaǵy aýdandardan opyrylǵan aǵashtar, qıraǵan avtokólikter, qulaǵan qurylys zattary, elektr jelileriniń úzilgendigi jaıly júzden astam qońyraý shalyndy. Jeti adam zardap shegip, olardyń biri - 82 jastaǵy zeınetker búgin túnde qalalyq aýrýhanada kóz jumdy.
