Óskemen armatýralyq zaýyty KQK qajettilikteri úshin jabdyqtar shyǵarady
ASTANA. KAZINFORM – Úkimet úıinde Premer-mınıstrdiń birinshi orynbasary Roman Sklıardyń qatysýymen «Óskemen armatýra zaýyty» AQ («ÓAZ» AQ) men «Kaspıı Qubyr Konsortsıýmy-Q» AQ («KQK-Q» AQ) arasynda yntymaqtastyq týraly kelisimge qol qoıý rásimi ótti. Bul týraly Úkimettiń baspasóz qyzmeti habarlady.
Ónerkásiptik jabdyqtyń ımportyn almastyrý jónindegi qujatqa «ÓAZ» AQ bas dırektory Aleksandr Býdrıs jáne Kaspıı qubyr konsortsıýmynyń bas dırektory Nıkolaı Gorban qol qoıdy.
Yntymaqtastyq bekitkish armatýranyń, sorǵy agregattarynyń jáne elektr qozǵaltqyshtarynyń jergilikti óndirisin damytýǵa, magıstraldy munaı qubyry nysandarynda otandyq jabdyq qoldanýdy keńeıtýge, sondaı-aq qubyr armatýrasynyń qazaqstandyq iri óndirýshisi men munaı tasymaldaý ınfraqurylymyndaǵy negizgi operatorlarynyń biri arasynda ornyqty kooperatsııany qalyptastyrýǵa baǵyttalǵan.
Kelisim sheńberinde taraptar «KQK-Q» AQ-ny Qazaqstannan shyqqan joǵary tehnologııalyq materıaldarmen, jınaqtaýshy bólshektermen jáne jabdyqtarmen qamtamasyz etýge, jabdyqqa tehnıkalyq qyzmet kórsetýdi, jabdyqty jańǵyrtý jáne synaqtan ótkizýge, sondaı-aq ınnovatsııalyq tehnologııalyq sheshimderdi birlesip ázirleýge ári engizýge nıetti.
Buǵan deıin Qazaqstanda shyǵarylǵan armatýra qaı elderge eksporttalatynyn jazǵan bolatynbyz.