Óskemen-Altaı tasjolyndaǵy jıren tústi bultqa qatysty tekserý júrgizildi

ÓSKEMEN. QazAqparat – Shyǵys Qazaqstan oblysyndaǵy «Óskemen-Altaı» tasjolyndaǵy «jıren» tústi bultqa qatysty tekserý júrgizildi, dep habarlaıdy QazAqparat tilshisi.

Kesheli beri áleýmettik jelide «Óskemen-Altaı» tasjolyndaǵy jıren tústi bulttyń vıdeosy tarap jatyr. ShQO ekologııa departamenti baspasóz qyzmetiniń málimetine súıensek, atalǵan faktige oraı tekserý júrgizildi.

«19 aqpanda sol mańdaǵy Sajaev ken ornynda taý-ken jumystaryn júrgizýge arnalǵan jobalyq qujattamadaǵa sáıkes, josparly jarylys jumystary júrgizilgeni belgili boldy. Bul sodan shyqqan shań», - delingen aqparatta.

Vedomstvo dereginshe, ótken jyldyń jeltoqsan aıynda da Altaı aýdany Buqtyrma aýylynyń ústindegi «qyzǵylt sary» bult kóptiń narazylyǵyn týǵyzǵan bolatyn.

Sol kezde «Buqtyrma tsement kompanııasy» JShS-ne qatysty jospardan tys ekologııalyq tekserý júrgizildi. Sonda da osyndaı bulttyń jarylystan paıda bolǵany anyqtalǵan edi.

Vıdeodan alynǵan kadr