«Óskemen - Almaty» poıyzynda ul bala dúnıege keldi
JARMA. QazAqparat - Jolaýshylar poıyzynda taǵy bir náreste dúnıege keldi, dep habarlaıdy QazAqparat «Jolaýshylar tasymaly» kompanııasyna silteme jasap.
Keshe №351 «Óskemen - Almaty» baǵyty boıynsha qatynaıtyn jolaýshylar poıyzynda náreste dúnıe esigin ashty. Vıktorııa Marochkına boıy - 46 sm, al salmaǵy - 2,7 keli bolatyn ul balany dúnıege ákeldi.
«Sapar barysynda jolaýshy tolǵata bastady. Poıyz basshysy jaqyn mańda ornalasqan Jarma stansasyna jedel járdem shaqyrtty. Biraq Vıktorııa Marochkına stansaǵa jetpeı, jolserikter jáne poıyzda kele jatqan dárigerdiń kómegimen aman-esen bosandy. Balaǵa Matveı degen esim berilip, ol anasymen birge Jarmadaǵy perınataldy ortalyqqa jetkizildi» delingen habarlamada.
Al náresteniń ákesi Valera telefon arqyly osy qýanyshty jaǵdaıǵa atsalysqan barsha azamattarǵa sheksiz alǵysyn aıtty.
