Óskemende alyp qyz dúnıege keldi
ÓSKEMEN. KAZINFORM – Óskemen qalasynda salmaǵy 6 keliden asatyn alyp qyz týdy. ShQO Densaýlyq saqtaý basqarmasy baspasóz qyzmetiniń málimetine súıensek, bul óte sırek kezdesetin jaǵdaı. Áıel Óskemendegi Ana men bala ortalyǵynda bosanǵan.
— Salmaǵy 6045 gramm bolatyn qyz bala dúnıege keldi. Osyndaı salmaqtaǵy náresteler tym sırek. Bul tek ata-ana úshin ǵana emes, bosandyrýǵa qatysqan búkil medıtsına qyzmetkerleri úshin úlken qýanysh boldy, — deıdi ortalyq dárigerleri.
Abyroı bolǵanda, bári sátimen ótken. Ana men shaqalaq ózderin jaqsy sezinedi. Ázirge alyp qyzǵa esim qoıylmaǵan.
— Óte qýanyshtymyz. Mende bári jaqsy. Ana men bala ortalyǵynyń ujymyna myń alǵys! , — deıdi anasy.
Eske salsaq, osyǵan deıin semizdikke shaldyqqan balalar sany artyp bara jatqany habarlanǵan.