Óskemen ákiminiń orynbasary jazasyn «qoǵamdyq kólikte» óteıtin boldy
ASTANA. QazAqparat - Óskemen qalasynyń ákimi Qýat Tumabaev óziniń orynbasary Rasýl Manapovqa eki aı boıy qyzmettik kólikti paıdalanýǵa tyıym saldy. Búgingi kúnnen bastap, qańtar aıynyń birine deıin ol jumysqa qoǵamdyq kólikpen keletin bolady, dep habarlaıdy «QazAqparat» HAA tilshisi Óskemen qalasy ákiminiń baspasóz hatshysy Ásem Seksenovaǵa silteme jasap.
«QR Memlekettik qyzmet isteri agenttiginiń ShQO boıynsha departamentiniń etıka boıynsha Keńesinde Óskemen qalasy ákiminiń orynbasary Rasýl Manapovtyń qyzmettik kólikti jeke paıdasyna jaratqany týraly shýly oqıǵa taraǵan bolatyn. Qazan aıynda, jeksenbi kúni Rasýl Manapov demalys bazasyna óziniń qyzmettik kóligimen baryp, demalyp júrgeni belgili bolǵan», - dep habarlaıdy baspasóz qyzmetinen.
Qala ákiminiń orynbasary ózine taǵylǵan kináni tolyq moıyndap, «Óskemen tártip» kásipornynda 20 saǵat qoǵamdyq jumys atqarýǵa mindettelgen. Sonymen birge, ol memleketke keltirilgen shyǵyndy óteıtin boldy. Buǵan qosa ol qala ákiminiń mindetteýimen qańtar aıynyń birine deıin qyzmetti kólikti paıdalanýdan shektelip, jumysqa qoǵamdyq kólikpen keletin boldy.
