Óskemen ákimi Instagramda jańa aıaldamalar úshin daýys jınaýda
Shahar basshysy Instagram-daǵy jeke paraqshasynda qalada eski aıaldamalardy aýystyrý boıynsha jumystar bastalǵanyn jazdy. Jańa aıaldamalar Ordjonıkıdze kóshesinde boı túzep úlgerdi. Qalǵan aıaldamalardyń ornatylatyn jerin jáne olardyń qandaı dızaında bolatynyn turǵyndar ózderi tańdaı alady. Ol úshin ákimniń jazbasynyń astyna óz usynystaryn jazý qajet.
«Jyldyń sońyna deıin jalpy sany 29 keshen aýystyrylady. Onyń 11-i jyly aıaldama bolady. Osy posttyń astyna jańa aıaldamalardy qaı jerlerge ornatý qajettigin jazýǵa bolady. Jańa aıaldamalar kóp daýys jınaǵan oryndarǵa ornatylady. Sonymen qatar jylytylatyn aıaldamalardyń jobasyn usynýǵa bolady», - dedi J.Omar.
Eske salaıyq, Jaqsylyq Omar Óskemen qalasynyń ákimi bolyp bıylǵy tamyz aıynda taǵaıyndalǵan bolatyn. Ol 2013 jyldyń mamyrynan 2016 jyldyń qarashasyna deıin - ShQO ákiminiń orynbasary, al jańa laýazymyna deıin Almaty oblysy ákiminiń orynbasary qyzmetin atqardy.
Áleýmettik jelide óte belsendi. Jańa laýazymǵa taǵaıyndalǵan bir aıdan keıin Facebook paıdalanýshylarymen shaharda atqaryp úlgergen jumystarymen bólisti.
