Óskemen ákimdigi qaladaǵy kólik keptelisine qatysty túsinik berdi
ÓSKEMEN. QazAqparat - Óskemende kólik keptelisine sebepker bolǵan jol jóndeý jumystary eki aptanyń ishinde aıaqtalady. Bul týraly qalalyq TKÚSh bóliminiń basshysy Rýfat Akramov aıtty, dep habarlaıdy QazAqparat tilshisi.
Jańa oqý jyly bastalǵaly beri Óskemende kólik keptelisi turǵyndarǵa jaısyzdyq týǵyzýda. Oǵan sebep - qalanyń birneshe bóliginde júrip jatqan jol jóndeý jumystary. Eń úlken keptelis Sátpaev dańǵylynyń boıynda paıda bolǵan. Tańerteń shahardyń JMK aýdanynan ortalyqqa, keshke ortalyqtan JMK aýdanyna kirý muń bolyp tur. Qalalyq turǵyn úı-kommýnaldyq sharýashylyq basqarmasynyń basshysy Rýfat Akramov jýrnalıstermen birge jóndeý jumystarynyń basyna baryp, jaǵdaıdy túsindirdi.
Onyń aıtýynsha Sátpaev dańǵylyn keńeıtý jumystary keler jyldyń kúzinde tolyq aıaqtalmaq. Al bıyl K.Marks kóshesiniń qıylysynan Á.Baıbatshın kóshesine deıingi bóligin tapsyrý josparlanyp otyr.
«Kósheni keńeıtý qosymsha jolaqtar tóseýden bólek jan-jaǵyn abattandyrý, aryq tartý sııaqty jumystardy talap etedi. Qozǵalys qıyndaǵandyqtan, atalmysh bóliktegi joldy kelesi aptada qoldanysqa beremiz. Ázirge burynǵydaı ár baǵytqa eki jolaq qyzmet etetin bolady. Qazir joldyń astyńǵy qabattary tóselip boldy. Osy aptanyń aıaǵyna deıin eki qatpar asfalt salamyz. Sodan keıin keptelis seıilýi tıis» - deıdi Rýfat Akramov.
Keptelistiń ekinshi oshaǵy Krylov jáne Protazanov kósheleriniń qıylysynda qalyptasyp otyr. Mundaǵy jumystar qyrkúıektiń aıaǵyna qaraı bitedi degen esep bar. Osy qıylys pen Astana kóshesin jalǵap turǵan Úlbi kópiriniń qurylysy da eki aptanyń ishinde bir jaǵyna shyǵýy tıis. Keńeıtý jumystarynan keıin Protazanov kóshesinde burynǵy eki jolaqty qozǵalystyń ornyna 3 jáne 4 jolaqty qozǵalys paıda bolsa, Astana kóshesinde burynǵy eki jolaqtyń ornyna 3-6 jolaq tóselýde. Al Úlbi kópiriniń eni 6,5 metrden 8,1 metrge keńeıtilip otyr. Rýfat Akramovtyń aıtýynsha, buǵan deıin kópirdegi eki jolaqty qozǵalys normatıvke qaıshy bolǵan. Qos qaptaldaǵy jaıaý júrginshiler jolyn kópirge qosý arqyly jolaqtar normatıvke saı keńeıtilip otyr.
«Buryn sál úlken kólik kirse, mundaǵy eki jolaqty qozǵalys buzylatyn. Endi ár baǵyt boıynsha kólikter eki jolaqpen emin-erkin ótetin bolady. Al jaıaý soqpaq eki baǵyttyń ortasynan oryn tepti. Áýeli kópirdiń bir jaǵy qoldanysqa beriledi. Ekinshi jaǵy bitkenshe kólikter ersili-qarsyly baǵytta birinshi bólikpen qatynaıtyn bolady» - deıdi Rýfat Akramov.
Úlbiniń ekinshi jaǵasyndaǵy Astana kóshesinde kólik qozǵalysy arakidik toqtatylýy saldarynan Táýelsizdik dańǵylynda da jıi keptelis oryn alýda. TKÚSh bóliminiń basshysy bul másele erteńnen bastap joıylatynyn atady.
«Erteń Astana kóshesiniń ón boıynda qozǵalys jandanady. Tek Úlbi kópirine jol joq Al Potanın kóshesi men táýelsizdik dańǵylyna deıin jol ashyq. Endi 2 aptadan keıin búgingi keptelistiń bári seıiledi» - dedi Rýfat Akramov.
Jóndeý jumystaryna jaýapty merdigerler barlyq nysandy ýaqytynan buryn tapsyrýǵa daıyn ekenderin aıtady. Ol úshin qarjy da, adam kúshi men tehnıka da jetkilikti kórinedi. Bıyl atalǵan kóshelerdiń joldary jóndeýden ótse, keler jyly mańaıy abattandyrylyp, túrli gúlzarlar men velojoldar, balalar adańqaıy men aıaldamalar ornatylatyn bolady.
