Óskeleń urpaqtyń bos ýaqytyn tıimdi ótkizý qajet — Prezıdent
ASTANA. KAZINFORM — Óskeleń urpaqtyń bos ýaqytyn tıimdi ótkizýine jaǵdaı jasap, kitaphana, mýzeı, mektep, saıabaq jáne basqa da qoǵamdyq nysandardy barynsha tıimdi paıdalaný kerek. Bul týraly Memleket basshysy Qasym-Jomart Toqaev Qazaqstan Halyq Keńesiniń birinshi sessııasynda aıtty.
Prezıdent óskeleń urpaqqa aıryqsha nazar aýdarýdy da — Halyq Keńesiniń mindeti dep atady.
Oqýshylar men stýdentter sabaqtan tys ýaqytta sportpen shuǵyldaný, jańa bilim ıgerý, kitap oqý sekildi kókjıegin keńeıtetin jasampaz isterge den qoıýǵa tıis.
— Ol úshin kitaphana, mýzeı, mektep, dostyq úıleri, saıabaqtar sııaqty qolda bar ınfraqurylymdy barynsha jumyldyrý kerek. Sonymen qatar basqa da qoǵamdyq nysandardy kóbeıtken jón, — dedi Qasym-Jomart Toqaev.
Muny tek úlken qalalarda ǵana qolǵa almaı, shaǵyn shaharlar men aýdan ortalyqtaryna, aýyldarǵa basa nazar aýdarý mańyzdy.
— Qoǵamdyq ortanyń sapasy adamnyń turǵylyqty jerine baılanysty bolmaýǵa tıis. Úkimetke ákimdiktermen jáne tıisti memlekettik organdarmen birigip, osy máselege qatysty naqty usynystar daıyndaýdy tapsyramyn, — dedi Memleket basshysy.
Sonymen birge, Halyq Keńesi memleket pen jekemenshik seriktestigi tetigin naqty iste qoldaný máselesine nazar aýdarýy kerek.
— Mádenıet pen kreatıvti ındýstrııa salasyndaǵy jobalardy uzaq ýaqyt boıy qarjylandyrýǵa múmkindik berý úshin endaýment qorlar týraly zańnamaǵa ózgeris engizý qajet. Basqasha aıtqanda, biz azamattarymyzdyń qoǵam ómirine jan-jaqty atsalysýyna barynsha jaǵdaı jasaýǵa tıispiz. Óıtkeni úlken ózgerister kishkene qadamdardan bastalady. Ult pen adamı kapıtaldyń jańa sapasy dál osylaı qalyptasady, — dedi Q. Toqaev.
Buǵan deıin Qasym-Jomart Toqaev eldi kórkeıtýge árbir azamat atsalysýy kerektigin aıtqan edi.
Prezıdent tazalyqty ulttyq brendke aınaldyrý keregin aıtty.
Sondaı-aq, abattandyrý isine jumsalǵan qarjy — halqymyzdyń bolashaǵyna jasalǵan ınvestıtsııa ekeni aıtyldy.
