Óskeleń urpaq eldik múdde jolynda aıanbaı eńbek etýi kerek - Máýlen Áshimbaev

NUR-SULTAN. QazAqparat - Jeltoqsan – qazaq úshin qasterli aı. Mundaı pikirdi «Zeren» respýblıkalyq lageriniń jabylý rásimine qatysýyna oraı áleýmettik jelide pikir jazǵan QR Parlamenti Senatynyń tóraǵasy Máýlen Áshimbaev aıtty, dep habarlaıdy QazAqparat tilshisi.

«Búgin «Zeren» respýblıkalyq lageriniń jabylý rásimi ótti. Sonyń aıasynda elimizdiń bir top talantty jastarymen kezdesip, Táýelsizdiktiń qadir-qasıeti, ony saqtaýdyń mańyzy jáne jeltoqsan aıynyń ult tarıhyndaǵy orny jóninde sóz qozǵadyq. Shyn máninde, jeltoqsannyń halqymyz úshin qadiri bólek. Sebebi, Alash avtonomııasynyń jarııalanýy, 86-daǵy Jeltoqsan oqıǵasy, Tuńǵysh Prezıdentimizdi saılaý, Táýelsizdikke qol jetkizý sııaqty eldik pen egemendikke bastaǵan mańyzdy oqıǵalar osy aıda bolǵan. Tipti resmı túrde Aqmolaǵa astana mártebesi berilgen kún de jeltoqsannyń enshisinde. Sondyqtan jeltoqsan – qazaq úshin qasterli aı. Biz osylaı ótkennen ónege ala otyryp, aldymyzda turǵan eń basty mindet Táýelsizdikti saqtaý jáne eldikti nyǵaıtý ekenin tereń túsinýimiz kerek. Osy baǵytta jastarymyz belsendilik tanytyp, Otanǵa qyzmet etýdiń ozyq úlgisin kórsetý qajet dep esepteımin. Ol úshin bılik tutqasyn ustap, sheneýnik bolý mindetti emes. Eń bastysy, árkim sapaly bilim alyp, óz salasynda bıik belesterdi baǵyndyrýy tıis. Eldiń damýyna qosylǵan eń úlken úles sol. Sebebi, jastardyń jeńisi – memleket jetistiginiń kepili. Sondyqtan óskeleń urpaq aldaryna naqty maqsattar qoıyp, eldik múdde jolynda aıanbaı eńbek etý kerek», - dep jazdy Senat tóraǵasy Facebook paraqshasynda.

Sonymen qatar ol týǵan el úshin eńbek etý – ár azamattyń qasıetti boryshy ekendigin basa aıtty.

«Tarıhta aty qalǵan batyrlarymyzdyń erligi, HH ǵasyrdyń basyndaǵy Alash arystarynyń áreketi osyndaı mártebeli mindetke taban tireıdi. Soǵys jyldaryndaǵy, odan keıingi kezeńdegi býyn da ultty saqtap qalý úshin jumys istedi. Elbasy bastaǵan býyn táýelsiz Qazaqstandy quryp, memleket qalyptastyrdy. Nursultan Ábishuly osy mańyzdy mindetti ári qaraı jalǵastyrý úshin el tizginin kelesi býynǵa amanat etip tapsyrdy. Búginde Prezıdentimiz Qasym-Jomart Kemeluly Toqaevtyń bastamasymen memleketti órkendetý úshin aýqymdy jumys atqarylyp jatyr. Erteń kezek táýelsizdik jyldarynda týǵan jastarǵa keledi. Sondyqtan órenderimiz osy jaýapkershilikti búginnen bastap sezinip, amanatqa laıyqty urpaq bolyp qalyptasýy qajet», - dedi Máýlen Áshimbaev.⁣⁣⠀

Senat tóraǵasy Qazaqstanda talantty, otanshyl jastar óte kóp ekendigine basa nazar aýdarady.

«Búgin solardyń bir tobyn «Daryn» memlekettik jastar syılyǵymen saltanatty túrde marapattadyq. Syılyq ıegerleriniń bári óz salasy boıynsha aıtarlyqtaı jetistikterge jetken, egemen elimizdiń órkendeýine óz úlesin qosyp kele jatqan alǵyr azamattar. Olardyń qatarynda bilikti jýrnalıst Raýan Mynbaev, sportta el namysyn abyroımen qorǵap, qaısarlyǵymen talaıǵa úlgi bolǵan Jiger Kenjeǵalıev, dástúrli án ónerimizdi dáripteýde belsendiligimen tanylǵan Kúnsulý Túrikpen, klassıkalyq mýzykanyń qyr-syryn jetik meńgergen Jibek Musyrǵalıeva, qoǵamdyq jumysta alǵyrlyǵymen kózge túsip júrgen Maksım Spotkaı sııaqty birqatar daryndy ini-qaryndastarymyz bar. Syılyq alǵan barlyq jastardy shyn júrekten quttyqtaı otyryp, aldaǵy ýaqytta budan da bıik shyńdardy baǵyndyra berýine tilektestigimdi bildiremin», - dedi ol.