«Oskar» týraly qyzyqty derekter
ASTANA. QazAqparat - Erteń, 2 naýryzda 86-shy «Oskar» syılyǵyn marapattaý sharasy ótedi. Osy aıtýly oqıǵa qarsańynda «Oskarǵa» qatysty qyzyqty derektermen bólisýdi jón sanadyq.
- Kınematografııalyq ónerler men ǵylymdar akademııasynyń syılyǵy 1929 jyldan beri dástúrli túrde tabystalyp keledi. Bul kınosyılyqty MGM stýdııasynyń basshysy Lýıs B. Maıer oılap tapqan. - «Oskardy» eń kóp alǵan adam - Ýolt Dısneı. 1932 jyldan bastap bul ańyz tulǵa syılyqty jyl saıyn derlik alyp otyrǵan, barlyǵy 26 ret «Oskar» ıegeri boldy. - «Oskar» syılyǵynyń sımvoly - brıtanıı qorytpasynan quıylyp, syrtynan altyn jalatylǵan, mármár tuǵyrǵa ornatylǵan qolyna qylysh ustaǵan serini beıneleıtin músin. Músinniń eskızin Sedrık Gıbbons esimdi dızaıner ish pystyrarlyq jınalystardyń birinde syzyp shyqqan eken. - «Oskar» sózi alǵash ret 6-shy marapattaý sharasynda qoldanyldy. Áli kúnge deıin bul attyń shyǵý tarıhy men maǵynasy týraly túpkilikti túsinikteme joq.Rejısser Mıshel Hazanavıchýs «Oskar» alý ústinde (2012) - 2012 jylǵy frantsýz tildi «Artıst» fılmi jáne onyń rejısseri Mıshel Hazanavıchýs «Úzdik fılm», «Úzdik rejısser» nomınatsııalaryn jeńip aldy. Osyǵan deıin bul kategorııalardy tek aǵylshyn tildi kartınalar men rejısserler ǵana alyp otyrǵan edi. - Akademııa quramyna 6000-nan astam adam kiredi. - Akademıkter daýystaryn berip, sanaq júrgizilgennen keıin, «Oskar» jeńimpazdarynyń esimderi saltanatty sharaǵa deıin tek eki adamǵa ǵana belgili bolady. Olar - daýystardy esepteýmen aınalysatyn «Price Waterhouse Coopers» aýdıtorlyq kompanııasynyń eki sarapshysy. Sanaq júrgiziletin orynnyń meken-jaıy qupııa saqtalady. Jeńimpazdardyń esimderi jazylǵan konvertter de marapattaý ótetin jerge asa qupııa marshrýttarmen jetkiziledi. - Eń kóp «Oskar» alǵan fılmder: «Ben-Gýr» (1959), «Tıtanık» (1997) jáne «Saqınalar ámirshisi: Koroldiń oralýy» (2003) - árqaısysy 11 retten. - «Oskardy» eń kóp ıemdengen akterler: Ketrın Hepbern (4 ret), Merıl Strıp (3 ret), Ýolter Brennan (3 ret), Ingrıd Bergman (3 ret), Denıel Deı-Lıýıs (3 ret), Djek Nıkolson (3 ret). Sońǵy ýaqyttarda «Oskar» kóp synǵa ushyrap júr. Sonyń ishinde Akademııa músheleriniń daýystaryna túrli jarnama kompanııalary, fılmderdiń prokattaǵy tabysy men tanymaldyǵy óz yqpalyn tıgizedi degen syndar aıtylýda. Qalaı desek te, «Oskar» áli de kınogerler úshin óz bedelin joǵalta qoıǵan joq, áli talaı jyldar boıy kıno áleminiń eń salmaqty syılyǵy bolyp qala bermek, dep jazady kinostan.kz.
