«Oskar» syılyǵynyń ıegerleri Ámire Qashaýbaev týraly aǵylshyn tilinde fılm túsirmek
ASTANA. QazAqparat - Qazaqstanda Ámire Qashaýbaev týraly mýzykalyq fılmge túsý úshin kastıng jarııalandy. Fılm aǵylshyn tilinde túsiriledi. «Moviq» kınokompanııasynyń habarlaýynsha, fılmniń prodıýserleri «Oskar» syılyǵynyń ıegerleri Kerı Grant pen Ed Djons bolady.
Fılm kezinde 8 mýzykalyq nomer qoıylymy bolady. «Fılm aǵylshyn tilinde túsiriledi. Oǵan túsý úshin azııalyq kelbetti er adamdardy (qazaq) kastıngke shaqyramyz», - deıdi uıymdastyrýshylar.
Kastıngtiń basty talaptary myna jerde kórsetilgen.
Aıta keteıik, Qashaýbaev Ámire - qazaqtyń ataqty ánshisi, akter ári mýzykanty. 1925 jyly Parıjde ótken Dúnıejúzilik sán óneri kórmesinde etnografııalyq kontsertte «Aǵash aıaq», «Qanapııa», «Úsh dos», «Jalǵyz arsha», «Qos balapan», taǵy basqa ánderdi oryndap ekinshi oryn alyp, kúmis medal ıemdenedi.
«Parıj aptalyǵy» gazeti men «Le mıýzıkl» jýrnaly Ámire Qashaýbaevtyń sırek kezdesetin talant ekenin jazsa, Sarbonna ýnıversıtetiniń professory Perno fonografqa Ámireniń oryndaýynda birneshe án jazyp alǵan. Osylaısha Ámire Qashaýbaev shet elde óner kórsetip qazaq elin tanytqan tuńǵysh ánshi boldy. 1927 jyly Máskeý konservatorııasynda qazaq ánderin tamyljyta shyrqady. Germanııanyń Maındaǵy Frankfýrt qalasyndaǵy kontsertke qatysyp, qazaqtyń halyq ánderin taǵy da álemge pash etti. Ámire Qashaýbaevtyń ánderi dúnıe júzi mádenıetiniń iri ókilderi Romen Rollan, Anrı Barbıýs taǵy basqalar tarapynan joǵary baǵa alǵan.
