«Oskar» syılyǵyn tapsyrý rásiminde 89 jyldyq tarıhta bolmaǵan oqıǵa oryn aldy
ASTANA. QazAqparat - Los-Andjeleste Dolby teatrynda ótken 89-shy «Oskar» marapatyn tapsyrý rásiminde túsinispeýshilikter oryn aldy. Uıymdastyrýshylar «Eń úzdik fılm» jazylǵan konvertti shatastyryp alǵan.
Ótken ǵasyrdyń tanymal akteri, kınorejısser jáne prodıýser Ýorren Bıttıge «Eń úzdik fılm» atalymy boıynsha jeńimpaz fılmdi jarııalaý mártebesi berildi. Ol konvertti ashyp, 2017 jyldyń úzdik fılmi «La-La-Lend» ekenin málimdedi.
Jetinshi Oskardy ıelengen shyǵarmashylyq top sahnaǵa shyǵyp, kórermenge alǵys bildirip, quttyqtaý lebizderin aıta bastady. Sol sátte uıymdastyrýshylardan qatelik ketkeni anyqtalyp, shyn máninde «Aı sáýlesi» fılminiń jeńiske jetkeni belgili boldy. Kesh júrgizýshisi Djımmı Kımmel «La-La-Lend» fılminiń prodıýserinen Oskar músinshesin julyp alyp, «Aı sáýlesi» fılminiń avtorlaryna berdi. 
«Aı sáýlesi» fılmi jeńiske jetedi dep eshkim kútpese kerek. Qalyń kórermen jeńimpazdardyń sózine qulaq aspaı, ýildeı bastady. Kesh aqsaqaly Ýorren Bıttı «Aı sáýlesi» fılminiń jeńimpaz ekenin rastap, jurtshylyqty sabyrǵa shaqyrdy. Mundaı keleńsizdik «Oskardyń» 89 jyldyq tarıhynda bolmaǵanyn atap ótken jón.
«Aı sáýlesi» - 2016 jyly túsirilgen amerıkalyq dramalyq fılm. Onda kedeılikke tap bolǵan, anasy esirtki qursaýyna shyrmalǵan, óziniń jynystyq baǵdary ózgeshe qara násildi jigittiń oqıǵasy baıandalady. 
«Úzdik fılmnen» bólek bul týyndy «Ekinshi plandaǵy úzdik er adam róli» jáne «Úzdik beıimdelgen stsenarıı» atalymy boıynsha eki Oskar júldesin ıelendi.
