Oskar syılyǵyn tabystaý kezinde aǵattyq jibergender rásimge eshqashan qatystyrylmaıtyn boldy
ASTANA. QazAqparat - Amerıkanyń kınoakademııasy Oskar syılyǵyn tabystaý kezinde konvertterdi aýystyryp alǵandarmen endi qaıtyp jumys istemeıdi. Uıymnyń prezıdenti Sherıl Býn Aızeks osylaı málim etti, dep habarlaıdy Bı-Bı-Sı agenttigi.
Daýystardy sanaý jáne jeńimpazdardyń attary jazylatyn konvert ázirleıtin PriceWaterhouseCoopers (PWC) aýdıtor kompanııasymen de jumys jasaý toqtatylady.
Oskar syılyǵyn tabystaý rásimi kezinde buryn-sońdy bolmaǵan olqylyq oryn aldy . Úzdik fılm atalymy boıynsha «Aı sáýlesi» týyndysynyń ornyna mıýzıkl «La-La Lend» jarııalanyp ketken edi.
Keıinirek belgili bolǵandaı, aǵattyqtyń oryn alýyna PWC qyzmetkerleri Braıan Kýllınan men Marta Rýız sebepshi bolǵan.
Olardyń árqaısysynda jeńimpazdar aty jazylǵan birneshe konvert bolǵan. ıAǵnı bir konvert tabylmaı qalǵan jaǵdaıda ekinshisin paıdalanýǵa týra keledi.
Emma Stoýnǵa «Úzdik aktrısa» atalymy boıynsha Oskar tabys etilgen soń qosymsha konvert qatelikten Ýorren Bıttıge berilgen, ol «Úzdik fılm» atalymy boıynsha jeńimpazdy jarııalaýy tıis edi.
«Men ne bolǵanyn aıtyp bereıin. Qaǵazda «Emma Stoýn. «La-La Lend» dep jazylǵan edi», - dep aqtaldy akter.
«La-La Lend» fılmin túsirýshiler kópshilik aldynda alǵys aıtyp bolǵannan keıin, PriceWaterhouseCoopers qyzmetkerleri men saltanatty rásimdi uıymdastyrýshylar sahnaǵa shyǵyp túsirilim toby men akterlerge jáne álemge aǵattyqtyń oryn alǵanyn habarlady.
