«Oskar» syılyǵyn alǵan alǵashqy arab fılmi
ASTANA. 16 qyrkúıek. QazAqparat - Haıf ál-Mansurdyń «Vadjda» fılmi - arab kınorejısserlary arasynan Oskar syılyǵyna ıe bolǵan alǵashqy týyndy. Armany velosıped satyp alý bolǵan on jasar arab qyzynyń qaısarlyǵy men jigeri kórinis tapqan bul kıno ataqty syılyqtyń shet tilindegi úzdik fılm nomınatsııasy boıynsha báıgege ilindi. Ataýly marapatpen qatar, 39 jasar Haıf ál-Mansurdyń kıno álemindegi ataǵy arab elinen shyqqan alǵashqy názikjandy rejısser retinde de aspandaı túsken edi.
Atalmysh fılmdegi basty keıipker rólin Ýaǵad Muhammed esimdi aktrısa somdaǵan bolatyn. Armany bolǵan velosıpedke qol jetkizý úshin ol Qurandy mánerlep oqý jarysynda jeńimpaz atanyp, aqshalaı syılyq utyp alady. Fılmde maqsat jolynda qaısarlyq tanytqan qarshadaı qyzdyń qoǵamdyq oryndarda tyıym salynǵanyna qaramastan velosıped qydyrǵany týraly kórinis bar. Dál osy kartına jaryqqa shyqqan ýaqyttan sál keıin Saýd Arabııasynda atalmysh tyıymnyń kúshi joıyldy, dep habarlaıdy muslim.kz saıtynan.
«Biz elimizdiń mádenıeti men salt-dástúrinen shyynaıy habar beretin ári bastan-aıaq Saýd Arabııasynda túsirilgen alǵashqy kórkem fılmdi maqtan tutamyz», - deıdi Saýd Arabııa memleketiniń mádenıet pen óner qoǵamynyń jetekshisi Sultan ál-Bazız.
Osy aptada Los-Andjeles qalasynda atalmysh fılm prokatqa shyǵady. Amerıkalyqtar joǵary baǵalaǵan juldyz fılm Dýbaı qalasynda ótken kınofestıvaldiń «Úzdik arab fılmi» men «Úzdik áıel róli» ataqtaryn da qanjyǵasyna baılady. Kıno álemindegi keremet jetistikterge jetelegen kınosynyń keıbir kadrlaryn Haıf ál-Mansur qala kóshelerinen uzaq ýaqyt boıy jasyryn kamera arqyly túsirip kelgendigin jasyrmady.
